Dit jaor kint de Leedjesaovend ein niej zjurie: de Vorstejurie. Heein hebbe de zes Vorste van de zustervereiniginge plaats en bringe de stum oét names de wieke van Venlo. De Vorste stelle zichzelf en eur vereiniging gaer aan ôg veur:

De Gaaskaetel
De vastelaovend steit alweer veur de deur. En weej van V.V. de Gaaskaetel zien dao klaor veur um ôg waer te laote te ammezere. Miene naam is Vors Gaasius, en in ‘t dageliks laeve Gé Baur 52 jaor en gebaore op de Veldensewaeg in Venlo.

Weej V.V. de Gaaskaetel zien opgerich in 1969 in cafe ‘t Noorden. Nao d’n brand in 1991 hebbe weej in cafe/feestzaal ‘t Pumpke ein nieje Residentie gevonde, wao weej Ben en Silvia van Aken dankbaar veur zien. Wao weej uniek in zien is, de Vastelaovend in ein eige jeske te staeke en dae zoeë te viere.

De Prinsereceptie wao beej de trio’s op det moment aanwezig, op de buhne staon en ein feesje bouwe mit de zaal. En zeker as weej op de receptie gaon beej ózze Zustervereinigingen, dao hebbe weej altiéd waal wat in petto.

Biezônder is det weej ‘t nieje vastelaovend seizoen 25 jaor in Cafe/Feestzaal ‘t Pumpke zitte. Weej, V.V. de Gaaskaetel winse ôg alves ein schoëne Vastelaovend 2016 toe.

De Vogelhut
In ‘t dageliks laeve Hans Hendrix. Bin getrouwd, heb twië blaage die ‘t hoes oét zien en twië kleinkinder.  Ein gezin wao weej gruuëts op zien en jao…, de vastelaovend zit ôs allemaol in ‘t blood. Eeder jaor te vinde op ‘t Prinsebal in de Vogelhut in 1998 gevraog um as Prins veur te gaon in de vastelaovend.   Vanaaf toen mich gaon inzette as sikkertaris en de Prinsekemissie.                                                                       

De aafgeloupe 10 jaor heb ik de iër gehad um VG de Vogelhut te meuge prissentere as Vors Volièrus.  ‘t kômmende jaor wuurt mien letste jaor. Mittertied is de Vogelhut oétgegreujd naor ein volwaerdig vastelaovesgezelschap.  In de zomer van 2013 hebbe weej ôs vertrouwde Vogelhut aan de Merelwaeg noëdgedwônge môtte verlaote. Ein niej volière woort gezôch en snel gevônde in d’n Dörpel aan de Gulikstraot.  Heej hebbe weej ôs genesteld en hebbe inmiddels ôs 4 x 11 jäörig jubileum gevierd. 

De Torvers
As laborant bin ik, Bart Daemen oftewaal Vors Törvius, in ‘t dageliks laeve drök in de weer um alles oéterein te haole um zoë van idder element ‘t fiene te weite. Ingewikkelde formules,  alkohol en drugs ofterwiél forensisch ondezeuk  vorme mien waereld.

Aevel, as Vors Törvius heb ik d’r ‘t grutste plezeer in um alles waat veur joeks en jen kint zörge juus beej mekaar te kiepere in de Vastelaoves-kaetel. Same mit alle andere, aktief beej ‘t gezelschap betrokke Törvers, reure weej flink door die soep en make d’r zoë steeds ein feesje van. Beej ôs smak det suupke altiéd aeve good!

In d’n aanloup nao 2017 vooge weej nog flink waat verse greunte toe aan die soep. Det jaor zulle weej ôs 4×11 jäörig jubileum oétgebreid gaon viere. De Törvers-femilie zal d’r op tiéd klaor veur zien. Miene laboratoriumjas aan de kapstok en de muts mit vaere op. Zoë stoum ik iërs same mit ôg op nao Vastelaovend 2016. Eine Vastelaovend mit opnie weer inkel joeksige leedjes!

De Moeraskwaakers
Ik bin Frank Vullings, oftewaal Vors Moerassius, sinds 2006 Vors van de Moeraskwaakers oét ‘t Ven, wao ik ouk Prins en Sirremoniemeister waas. Ik bin eigenaer van Garage Vullings Venlo, getrouwd en heb twië inmiddels volwasse kinder. ‘n Groët deil van miene vreejen tiéd staek ik in de Moeraskwaakers en in voetbalclub FCV. Ik bin ‘ne vastelaovesvierder in hert en nere, zoewaal in Venlo as in Kölle.

Vastelaovesvereiniging de Moeraskwaakers is opgerich op 11-11-1974 en besteit dus haos 41 jaor. ós Residentie is kefee-feeszaal ‘t Ven. Weej hebbe ‘n kleine 200 leje, waovan d’r ruum 50 ‘n functie vervölle binne de vereiniging. Weej ônderscheie ôs van ‘n aantal andere vereiniginge, doordet weej idder jaor ‘n eige motto hebbe, ‘nen optoch, ‘ne sleuteleuverdrach, ‘n Straolende Sterrebal en ‘n eige  jeugaafdeiling. D’r waere veur zoewaal jônk as ald activiteite georganiseerd um de Vense vastelaovend laevendig te halde.

De Kwas
De huidige Vors Kwastius is Hay Aerts, 39 jaor, bezig aan zien 6de jaor. As Vors haet hae in de riéke geschiedenis (56 jaor) van ‘t aldste buurtgerelateerde Vastelaovesgezelschap nog neet zoëvuël veurgangers gehad. Hae is dan auk pas de 5de persoën, dae dees iërebaan meug oétveure, daomei bekleid hae ein bestuursfunktie as Vice-veurzitter van Vg. de Kwas.
Vastelaovesgezelschap de Kwas resideert vanaaf eur ôntstaon in kefee-Feeszaal Ut Tref in ut hert van Venlo-Zuid. Haet as doelstelling um Vastelaovend te bringe in ‘t stadsdeil Venlo-Zuid, vanaaf ‘t viaduk wies aan de landsgrenze van Tegele en vanaaf de Maas wies aan ‘t Jaomerdal. Dit doon zeej met entreej vreeje aktiviteite; Galderbal, Pallesaotebal, Mini-Pallesaotebal, Krantprissentasie, Vastelaovesmis, Groëte- en Kleine Resepsie en Prônkzitting.
Iddere vastelaovesvierder, mit hert veur Venlo-Zuid, van groët wies klein probere weej te binde um de wiékvastelaovend laevend te halde.

De Wien
Vanoét de Maagdenberg in ‘t oëste van Venlo prissenteerd Vastelaovesvereiniging De Wien ôg vors Wienius, Eric Martens. Hae is mit zien 29 jaor ein van de jôngste vorste binne de Venlose vastelaovend.  Aan ervaring aevel gen gebrek.  Nao ônder andere sirremoniemeister en penningfoekser te zien gewaes is hae 2 jaor geleeje as vors Wienius beneump. As lid van de joekskemissie is hae al jaore meiorganisator van ônder andere ‘t leedjesmatinee en prônkzitting van De Wien. In ‘t dageliks laeve verdeent hae de kós as juris en daomei steit hae ouk minnig vereiniginge in de regio beej op dit gebied.  As hobbies haet hae motorrieje, kampere en sins kort ouk ‘t klusse in zien net gekochde hoès. Mit Prins Tom I en zien adjudante, aanwezig in de zaal, veult hae zich gesterk um alle deilnemers te veurzeen van ein streng maar rechvaerdig oordeil en heejmei De Wien op de juuste wiés te vertaegewäördige.

De Vaegers
Mien naam is Harry Lücker, nao Elf van Elf bin ik aevel veur vuuel minse Vors Vaeger. Dan begint ouk d’n tiéd det Venlo Vastelaoves Gezelschap De Vaegers dök in ‘t straotbeeld taegekump. De Vaegers behuure mit ‘t gebaortejaor 1978 tot de jôngere gezelschappe van Venlo, maar hebbe in de aafgelaupe jaore waal naam gemak binne de Venlose vastelaovend. Groët gewaore in Venlo-Zuud, staon weej taegeswoordigs in os residensie De Venlonazaal aope veur gans Venlo wanneer weej dao ôs Hudjesbal of zitting viere. Ouk zoelt geej ôs kinne van de Venlose vastelaoveskrant De Wazelaer, de prinselikke poszegel of van ôs kwante veurkômme. De Venlose vastelaovesleedjes zông ik al veurdet ik kôs praote, ‘t is dan ouk een ein iër det ik noow in de vorstejury meug plaatsneme.

Boete de Paort
Vors Paortius IV, Dennis van Haandel 37 jaor ald en vors van vastelaoves vereiniging Boëte de Paort oét Venlo Zuud. Vanaaf mien 3e laevesjaor betrokke beej Boëte de Paort wao mig de vastelaovend letterlik mit de paplaepel is ingegaote. De iër um Hoëgheid te meuge zien veel mich in 2005 ten deil in ôs 3×11 jubel jaor waonao ik in 2007 de scepter as Vors euver genaome heb.

Boëte de Paort is ein wiékvereiniging opgerich in 1978 mit ‘n intösse riéke historie mit as doel vastelaovend te bringe veur idderein. Jônk of ald, erm of riék, gezônd of krank idderein môt mei kinne geneete van dit prachtig stök kultuur. Vastelaovend det vierse namelik same! Dit jaor viere weej döbbel fees aangezeen os 4×11 jubileum same geit mit ‘t 1×11 jäörig jubileum van ôs jeugaafdeiling de Päörtjes. Daomei wuurt dit ‘n hiel biezonder jaor veur Boëte de Paort wao weej as vereiniging mit ontzettend vuuel plezeer nao oét kiéke.