Nieje sirremoniemeister

Tiedes ‘t vastelaovesseizoen 2008-2009 is bekind gewaore det de sirremoniemeister van Jocus, Herm Pollux, nao 16 jaor de bel en sirremoniemeistersstaaf veur ‘t lets zoel veure.  Op ‘n groët aantal momente tiedes ‘t aafgelaupe seizoen is stilgestaon beej deze markante persoën dae tiedes de algemeine leejevergadering op 14 september 2009 zien funksie officieel zal euverdrage aan zienen opvolger. Net zoë dök as det d’r de aafgelaupe maonde is gespraoke euver de verdeenste van Herm Pollux, is d’r gespeculeerd euver zienen opvolger: Wae dörf ‘t aan? Wae kint det? Wae geit ‘t waere?

Vandaag haet ‘t bestuur van Jocus aan al zien leeje per breef bekind gemak det Pascal Vaes tiedes de algemeine leejevergadering door ‘t bestuur zal waere veurgedrage as de nieje sirremoniemeister. Pascal Vaes is bekind mit de vereiniging en steit te book as ‘n krachtige en joeksige persoën wao ‘t bestuur alle vertrouwe in haet det hae ‘n waerdig opvolger zal zien van Herm Pollux.

Pascal Vaes is de veurzitter (kommissaris) van ‘t kommissariaat Riej en Traksie (R&T). Door de veurdrach van Pascal as sirremoniemeister, zal Jules Aerts, de huidige twiëde sikkertaris van de vereiniging, doorschuuve nao de funksie van kommissaris R&T. De kommissariaatsleeje hebbe inmiddels te kinne gegaeve zich volledig te kinne vinde in deze nieje veurzitter. Veur de aopevallende funksie van twiëde sikkertaris zal ‘t bestuur d’n hiër Gert Zondag tiedes de algemeine leejevergadering veurdrage. Gert is momenteel aktief binne de Joekskemmissie.

Jocus is d’r gruuëts op det zeej voor alle dreej de belangrieke funksies geschikte kandidate haet gevonde binne eur eige geledinge.

‘t Bestuur kies d’r bewus veur um alle leeje noow al te informere euver eur veurnemens. “De informasie is d’r belangriek genôg veur en dezen aopenheid pas gans in de menier wao-op ‘t huidige bestuur richting wilt gaeve aan Nederlands aldste Vastelaovesvereiniging”, alzoë veurzitter Harry Pouwels.