Nieje route Groëte Optoch Venlo: Parade geliék in ‘t iérste deil

De Groëten Optoch van Jocus, dae op maondaag 3 maart door de Venlose binnestad trek, haet ein nieje route, zoë haet de Technische Commissie van Jocus (TC) beslaote. Det beteikent det, in taegestelling tot veurgaonde jaore, de Parade neet aan ‘t ind van de route zit, maar juus aan ‘t begin. Daodoor kin ‘t publiek op de Parade al vanaaf 12.15 oor volop geneete van dit kleurriéke spektakel.

De vuuële opmerkinge van deilnemers en kiékers euver de geringe publieke belangstelling op bepaolde gedeiltes van de route waas veur de TC, verantwoordelik veur de organisatie, de belangriékste raeje um veur ein niej trajek te keze. De oétdaging is aevel, det de binnestad van Venlo zien beperkinge kint, juus door de talriéke karakteristieke smale sträötjes.

Nao vuuël wikke en waege, en wegstrepe van straote en alternatieve routes is oétintellik veur dees route gekaoze. “’t Is fijn um te constatere det de Venlose Horeca ondernemers spontaan hebbe toegezag um mei te dinke um ein aantal knelpunte op de route te verhelpe” aldus Ruud Brünken veurzitter van Jocus’TC. “We zien d’rvan euvertuug det de compacte vorm mit ein umliésting van miër horeca beej idderein in de smaak zal valle”.

De Groëten Optoch begint um klokkeslaag 12.11 oor en trek vanaaf de Daeke van Oppensingel nao de Kölse Paort, euver de Parade, Sint Jorisstraot, achterum ‘t stadhoés, veurlangs ‘t stadhoés, eine slinger euver de Mert, door de Steinstraot, euver de Alde Mert nao de Joedestraot. De ôntbinding ter huuëgte van de Kwartelemert.