Niej motto: Dao fleurse van op

Nao riép beraod haet de Technische Kemissie van Jocus ‘t nieje môtto veur ‘t vastelaovesseizoen 2011/2012 veurgedrage aan Vors Joeccius XI en zien wiéze Raod van Elf: "Dao fleurse van op"

De alde litteikes van de snelle nao-oorlogse wederopbouw en de jaore 70-architectuur van Venlo verdwiene langkzaam. De alde binnestad wuurt opgepimp, ‘n fonkelniej stökske "hertje stad" is inmiddels toegevoog en de nieje kontoere van de Maasboulevard verschiene aan de Maas. De Venlose Feniks klump oét de as mit behald van de gooje alde sfeer. Venlo krieg intelik ‘t uuterlik waat huurt beej de Venlose dynamiek. Want ondanks vuul ellende is dae noëits verlaore gegaon wie me kin zeen aan ‘t bleujende vereinigingslaeve, ‘t Zomerparkfees en netuurlik de eige unieke vastelaoveskultuur. In 2012 kump dao de Floriade nog beej. ‘n Extra kleurriék internationaal iërbetoën aan de broézende en verniejde stad.