Neet oét Lottum op Môtteballebal

De Venlose band Neet oét Lottum is ein van de belangriékste publiekstrekkers veur ‘t kômmende Môtteballebal, det zaoterdaag 26 jannewarie weer plaatsvindt in de Venlonazaal.  Naeve de Venlose band van alleskinner Frans Pollux zien d’r auk optraejes van de Hofkepèl, de Mootwörm, de winnaer van de Herfshane en netuurlijk de veer nieje Venlose schlagers.

Dit bal, waovan de tradisie ôs liërt det de deilnemers zich gen meujte bespare um kleurriék en humoristisch veur d’n daag te kômme, haet dit jaor ‘n heus prônkpodium. ‘n Zjurie bestaonde oét prominente Venlonaere beoordeelt de kreasies van de bezeukers op originaliteit. De kins ‘t Môtteballebal messchiens waal ‘t bes vergelieke mit d’n optoch, maar dan binnenshoés.

Bisse 18+, 20+, 30+, 40+ of nog alder? Det makt niks oét. “Doot ens mei!” De kaartverkaup is op dinsdaag 15 jannewarie vanaaf 20.00 oor en op zaoterdaag 19 jannewarie vanaaf 12.00 oor in Café In d’n dorstigen Haen aan de Mert in Venlo. De kaarte koste €15,-.

Op zaoterdaag 12 jannewarie zien d’r 10 kaarte te winne op radio Umroop Venlo.