Motto vastelaovend 2026-2027: Heej dreijt ’t um

 Vors Joeccius XI haet op vastelaovesdinsdaag ’t nieje Jocusmotto veur t kômmend sezoen bekind gemak: “Heej dreijt ’t um”. Heejmei wuurt ônderstreep wao de Vastelaovend in Venlo éch um dreijt: same lache, viere en same meidreije in de vastelaovend. 
 
Mit vastelaovend dreije weej ’t dageliks laeve auk um. Juus daorum is dit motto is vuuël miër as ein inspiratiebron veur leedjesschriévers en optochdeilnemer: ’t verwiés nao de kern van ôs fees, maar auk nao Venlo as ’t Stedje van Lol en Plezeer: altiéd volop in bewaeging en mit de vastelaovend verbindt ’t de inwoëners en bezeukers mit mekaar: idderein viert mei in ’tzelfde fiës. 
 
Mit dit nieje motto “Heej dreijt ’t um” kiék Venloosch Vastelaoves Gezelschap Jocus vol enthousiasme oét nao ein niej vastelaovessezoen wao-in Venlo weer op zien moëiste wiés meug ‘dreije’.