Motto 2016: Kump good!

Sinds 1631 hebbe in ‘t Kepèlke van Genuuje door de ieuwe haer al ontelbare pitjes gebörd. Opgestaoke door Venlonaere op zeuk nao verleechting in tiéje van élend of oozel, in de haop det alles weer good kump. Want dök zit ‘t laeve mei, maar soms zit alles taege waat taege kin zitte. Aevel, de allerdiekste kerse woorte gebrand um Os Leeve Vruike te bedanke det eur weegske in Venlo haet gestaon. Dao, in ôs schoëne stad aan de Majjem. Mit hard knuurende luuj, door ein unieke Vastelaovestradisie aan ein gesmeed. De Nar hilt ôs 3 daag ‘t speegel veur en liërt ôs um te relativere. De Venlonaer dae wet: "Det van ‘t ein ‘t ander kump" en "Waat kump toch kump". Alzoë neeme Venlonaere ‘t laeve smeis neet te zwaor en geluive, baeje en vertrouwe zeej det alles good kump. Wiej dan ouk.

‘t Môtto veur de vastelaovend van 2016 zal zien: Kump good!

Jocusse en Jocussine, träön zal ‘t altiéd gaeve en neemus kin zien leid ontgaon. Lache, danse en zinge kint geej noeits genôg doon. Laot Vastelaovend doordringe wiés in ôgge diekste tiën en dan zinge weej Venlonaere saame oét volle bors: Kump good!