Motivasie motto Vastelaovesseizoen 2013-2014

Idder jaor opniej bedink de Technische Commissie (TC) van Jocus ‘t motto veur ‘t nieje vastelaovesseizoen. Dit motto wuurt geprissenteerd op  ‘t ‘Stadhoés nao aafloup van de offcieuze trouwerie van ‘t Boerebroelofspaar. Dit motto wuurt mit ein motivasie veurgelag aan ôzze Vors Joeccius XI en de Raod. ‘t Motto veur ‘t seizoen 2013-2014 is "Laot ôs maar gewaere".

‘t ôntwerp van ‘t beejbehuúrende log wuurt gemak door Leon Peeters van de P&P kemissie. De motivasie is dit jaor as volg:

“Laot ôs maar gewaere”

Ein van de deepere inzichte is, det de op ‘t iërste oug chaotische Netuur um ôs haer zich toch luuët vange in logische petroëne. Petroëne die veur idderein geliék en toegangkelik zien. Laot de Netuur maar gewaere.

Waat meint scribent heejmei? Noow, beejveurbeeld; Méziek is te ordene in toënledders, Wiskunde in formules. Kleure in ‘t Kleurespectrum en Letters in ‘t Alfabet.

échte Vakluuj onderscheide zich, asse ze maar luuëts gewaere, door mit dees universele oétgangspunte toch weer gans niej en baanbraekend werk te kreejere. Zoë componeerde Strauss mit dezelfde toënledders hemelse méziek. Einstein beredeneerde oét geliékewiskundige principes zien E=mc². Rembrandt pienselde mit precies ‘tzelfde kleurespectrum “De Nachwach” en Shakespaere schreef mit exact dezelfde letters drama mit ôngekinde deepgang. Laot de hand van de Meister maar gewaere.

Nao analogie heejvan kinse stelle det de TC, asse ze maar luuëts gewaere, oét ‘tzelfde klötske holt, net det sjiekere decor mak. Of Jocus, asse ze maar luuëts gewaere, mit dezelfde ingrediënte welke in gans Limburg aanwezig zien, toch net ‘ne schoënere Vastelaovend oét d’n aek dreie. Dink maar effe truuk aan al die verwônderde Limburgse mörfkes tiédes de Nach van De Golde Humor.

Laot ôs Jocusse en Jocussine, Laot ôs Venlo, Laot Jocus oftewaal: Laot ôs maar gewaere, dan verlöp ôzze, op ‘t iërste oug chaotische, Vastelaovend weer good en gesmaerd.

Hoëgachtend,

TC JOCUS