Martinusschoël wint JLVK en Vastelaovestoppers

Zaoterdaag 11 fibberwarie is de Martinusschoël oét Venlo winnaer gewaore van de Vastelaovestoppers in Belfeld. Dit is ‘t Jeug Leedjeskonkoer wao alle nummers ein en twië van de leedjes konkoerse oét de verschillende stadsdeile van Venlo mit meidoon. De iërste plaats beteikent det de Venlose jônges en maedjes vastelaoveszaoterdaag in Venlo op maar leefs dreej podia eur nummer ein meuge zinge.

Daags daoveur had de Martinusschoël in eine joeksige Venlonazaal  ‘t 13e Jeug Leedjes Konkoers van Jocus gewônne. Maar leefs nege schoële streje veur ‘d’n Bart’,  de trofee verneump nao de ald veurzitter van Jocus Joekskemmissie Bart den Biessen. Oétintelik ware ‘t de jônges en de maedjes van dees Venlose schoël die mit ‘Papegeijemaedjes’ de iërste plaats haolde. Det beteikent det de kinder van de Martinusschoël naeve hiël vuuël optraejes ouk ein plekske op de kômmende Jocus CD  kriége.  Daonaeve wônne zeej ouk nog ens de ‘Veer van de Geer’, de iërste plaats veur de bes verkleide groep. Op de twiëde plaats indigde de Schoël mit d’n Biebel. Zeej mochte daorum ouk mei nao de Vastelaovestoppers in Belfeld.