LSO speult 60ste vastelaoveskonzert in Venlo!

Op woensdaag 8 fibberwari bringk ‘t Limburgs Symfonie Orkes veur de 60ste kiër ein vastelaoveskonzert in Venlo. Messchiens waal veur de letste kiër, want ‘t LSO geit same mit ‘t Braobants Orkes op in ‘t groëtere Orkes van ‘t Zuuje.

Joost Smeets haet d’r plezeer in. De oét Thorn aafkomstige bastubaspeuler van ‘t LSO leet veur de vastelaoveskonzerte van ‘t LSO zien blaosinstrument aan de kant en hanteert de dirigeerstok. Det duit haet euveriges al veur ‘t twiëde jaor. Same mit regisseur Theo Menting haet haet ein programma samengesteld det vuul vaerder geit as ‘n konzert.

"’t Is ein komplete theaterproduksie. Alles in de waereld wuurt sneller, vlotter en flitsender. Weej halde de bezeukers continu bezig, van ‘t moment det ze binnekômme wies det ze nao boéte gaon. Ze waere meigenaome in ôzze waereld. We werke mit acteurs, figurante, dansers, soliste en ein leechsjoow."

Geralt van Gemert is zingend acteur, Elske te Lindert sopraan, Jan Corstjens de prissentator. Veur de res wil Joost ‘t publiek veural verrasse en neet noow al name neume. Raeken op nogal waat Spaans/Mexicaans getinte meziek, op episodes oét de Fledermaus, maar auk op bekinde en nieje vastelaovesschlagers. "Ein deil van de konzerte wuurt in iddere plaats anders ingevöld. We speule in Gelaen, Mestreech, Heerle, Venlo, Remund, Wiërt en Sittard. Euveral kômme plaatselijke hotemetote aan bod in de prissentasie."

Joost dirigeert miër, veural in ‘t boételand, van Rusland wies de V.S.. Maar niks is zoë kwant as de vastelaoveskonzerte.

LSO Vastelaovesconcert 2013 in Theater de Maaspoort op woensdaag 6 fibberwarie, um 20:11 oor. Kaartverkaup via de Maaspoort.

Teks: Bert Salden