Leedjesaovend: stumme via internet

De Leedjesaovend van Jocus op 29 september aanstaonde zal weer inkele noviteite in zich meidrage.  Zoë is mit de Maaspaort aafgespraoke det auk de theaterzaal (de groëte tribune) vanaaf dit jaor auk gebroék kin waere, um op dees manier ruum 260 extra steul beschikbaar te hebbe veur publiek. Jocus haop op dees wies de groëte vraog nao extra kaarte in de zaal tegemoot te kômme.

Um de live oétzending van de Leedjesaovend auk boéte Venlo toegankelijk te make, zal Umroop Venlo de beelde dit jaor auk via internet oétzende. Dit beteikent det de ganse waereld live kin meigenete van de nieje leedjes. D’n Umroop is heejveur op zeuk nao Venlonaere die femilie in ‘t boételand hebbe woëne, um dees minse te kinne belle tiédes de oétzending. Kiék op www.omroepvenlo.nl veur mier informasie heejeuver.

‘n Letste noviteit is det alle leeje en donateurs die thoés achter de tillevisie of radio de oétzending meebelaeve, vanaaf dit jaor auk mei kinne stumme via internet. Op ‘n spesjale pagina zulle dees minse mit gebroék van eur leeje-/donateurskaart kinne inlogge en ‘n stum kinne oétbringe op eur favoriete leedje. Mier heejeuver informasie verschient op korte termien op dit thoésblaad.