TECHNIEK LEEDJESAOVEND

Ouk in 2012 brach Jocus de leedjesaovend neet allein nao ‘t publiek in de Maaspoort toe,  maar ouk nao doézende  vastelaovesmeziék leefhebbers in de hoéskamer. Det heejveur eine gas minse achter de scherme aan meiwerke zal beej ein idder bekind zien.
Minder bekind zien de gebroekde technieke. Wie det allemaol in zien werk geit laes geej heejônder.

De leedjesaovend is technisch ein complexe productie mit 4 disciplines:
• Video
• Audio
• Leech
• Verbindinge/euverige

Video ofwaal Beeld

‘t Gehiël wuurt gerigistreerd mit 6 camera’s waovan 3 handhelds, 1 riejbaar op ein camerabaan van 12 maeter en eine gemonteerde camera op eine kraan (crane).

Deze kraan is ein van de meis geavanceerde in Europa waobeej 4D bewaeginge meugelik zien. Behalve umhoëg, umliëg, links, rechs kan deze ouk nog mit ein ziër hoëge snelheid oétschuuve en is de kop haos 360 grade dreibaar.
De kraan haet 3 minse nuuëdig um ‘m te bedeene: eine bestuurder (hae dae d’r mei riedt); eine persoën dae ‘t oétschuuve verzörg; d’n operator (camera vrouw in dit geval) dae de rônddrei bewaeginge duit en tegeliékertiéd de scherpte en inzoome duit.
D’r zien in Nederland maar ein paar minse die dit kinne.

De regiewage is veurzeen van de niejste technieke en is full HD. In de regiewage zit de regisseur, einen assistent, eine persoën dae de beelde schakelt en eine persoën  dae de helderheid cônstant held Vaerder einen algemeine technicus dae d’r veur zörg det alles blief werke. D’r is ouk nog einen tape operator (reclames en instarte van filmpkes), eine schakeltechnicus dae de beelde op de projectiescherme in de zaal verzörg en eine persoën dae de graphics (titels ônder in beeld) duit.

Audio ofwaal Geluúd

‘t Audio is op te splitse in 4 disciplines:

• Zaalaudio: is detgene waat geej huúrt in de zaal. D’r is einen oétgebreide mixer nuuëdig umdet idder lid zienen eige microfoon of digitaal opneemelement haet en sômmige zoëas ein drumstel tot waal 8 kanale gebroek. Ouk zien d’r nog 10 draodloze microfoons veur de zengers en de presentatoren. D’r is vaerder oétgebreide apparatuur veur galm um d’r veur te zörge det ‘t signaal neet euverstuurt.
• Monitor audio: is de mix per orkeslid zoëdet zeej allein det huúre waat zeej wille. Gezeen ‘t groëte aantal orkesleeje is ein groëte mixtaofel nuuëdig. De bedeening steit altiéd direk naeve ‘t orkes.
• TV mix: is de mix dae geej toés huúrt en verschilt van de zaalmix umdet geej ouk de prissentatore van Umroop Venlo en reclames huúrt.D’r is einen aparte audiowage dae gans digitaal ‘t geluúd mix.
• Tillefoonvork: is ein installatie die ‘t tillefoongeluúd huúrbaar mak en wuurt bedeend door einen technicus dae de locaties belt. Hae haet heejveur zoëwaal ein vas as ein mobiel nummer beschikbaar.

D’r zien 2 trailers mit materiaal nuuëdig um de ganse Maaspaort van excellent geluúd te veurzeen.

Leech:

Veur ein tillevisieproductie is vuuël miër leech nuuëdig dan veur ein normale theaterproduktie. Ouk môt d’r veur gewaak waere det d’r tevuuël zwarte gater in d’n achtergrônd zitte. Tösse de verschillende camerabeelde meuge ouk neet tevuuël helderheidsverschille zitte. Um dit alles te realisere wuurt d’r ein leechplan gemak waobeej alle nuuëdige leecharmature ingeteikend waere.   Heejbeej wuurt raekening gehalde mit zichtheuk enz.

Tiédes de oétzending zien 3 minse actief: eine leechdesigner dae ‘t oétintelikke plaetje bepaolt en 2 operators die de cômplexe leechtaofels bedeene veur zoëwaal bewaegend leech as beejveurbeeld de Ledverleechting in ‘t podium.

Boéte al ‘t leech det standaard aanwezig is in Theater de Maaspaort wuurt nog einen extra trailer van 13mtr (ong. 60 m3) vol mit verleechting gebroek.

Verbinding/Euverige:

Um ‘t toés te kinne zeen is d’r ein directe verbinding nuuëdig vanoét de Maaspaort nao de Studio van Umroop Venlo. Heejveur wuurt op ‘t daak van de Maaspaort ein schôttel geplaats (en ouk ein beej d’n Umroop op ‘t daak) die digitaal ‘t signaal veur zoëwaal video as stereo audio in HD kwaliteit nao d’n Umroop steurt. Van dao aaf geit ‘t via ein glaasvezelverbinding nao ‘t kabelnetwerk en nao d’n internetprovider.
Um dit alles in gooje bane te leie is ein oétgebreid communicatienetwerk nuuëdig zoëdet alle disciplines zich ônderein kinne huúre en det doon waat de regisseur wilt.

D’r is ein oétgebreide, ervare ploog minse van Jocus aanwezig, die d’r veur zörge det alle artieste op tiéd klaor staon, de microfoons d’r zien, de oorkondes, bloome en priéze.

Al mit al werke d’r 150 minse um d’r veur te zörge det d’r zoëwaal toés as in de zaal ein perfecte show gegaeve wuurt. ôngeviër 90% duit dit gans vrijwillig en zônder enige vergoeding um ôg allemaol eine leuken aovend te bezörge.