Videoclips Jocusleedjes online

Op zôndaag 7 jannewari 2018 prissenteert Jocus de videoclips van de 4 winnende leedjes
De Pinguïn, Kômme traone dan gaon we, Zoë schoen en Wach neet wies morge.
Dit vindt plaats in poppodium Grenswerk, vanaaf 18.11 oor.
Aansloétend waere de videoclips online geplaats en zien dan veur idderein te zeen.

Veur twië jaor truuk is Venloosch Vastelaoves Gezelschap Jocus gestart mit ‘t producere van videoclips van eur veer winnende leedjes. Dees videoclips woorte miër as 300.000 kiër bekeke op de verschillende door Jocus beheerde SocialMedia, Omroep Venlo en L1 (LVK).

Door dit succes haet JocusTV ouk dit jaor clips van de 4 winnende leedjes, De Pinguïn, Kômme traone dan gaon we, Zoë schoen en Wach neet wies morge geproduceerd. 

Vanaaf 2017 wuurt idder jaor eine Venlose band oétgedaag om twië bestaonde Jocus leedjes van ein “niej jeske” te veurzeen. Nao “Josefien” (LVK winnaer 2000) en “Veur altiéd eine Venlonaer” haet LinkeMik ‘t stekske van Van Gelder euvergenaome.
LinkeMik koos veur bewerkinge, in BigBand stiel, van “Zutjes aan” oét 1988, oorsprônkelik gezônge door Joke Theeuwen en Wiel Vestjens. Zutjes aan woord geschreve door Wim Roeffen en Wiel Hermans.
Als twiëde nummer woord “Ik blief beej dich” oét 1997 en toen gezônge door Leta Bell en Quin Vaessen en geschreve door Guus Timmermans Jr.

JocusTV haet ouk van dees “LinkeMik nummers” videoclips gemak.
De zes clips waere zôndaag 7 jannewari um 18:11uur geprissenteerd in Pop Podium Grenswerk.
Nao aafloup waere de videoclips op ‘t YouTube-kanaal van Jocus TV gezatte.
Mit dezen aanpak wil Jocus ‘t bereik van de winnende liedjes vergruute en versterke.

De nummers zien daobeej ouk verkriégbaar op de cd “’t Is ôs gegaeve – 2018” en via digitale downloads en streaming-deenste.