Kièke in de keuke van… De Joeks kemissie
Asse de naam van ôs kemissie huúrs zalse dinke aan ein stel gezellig euver niks täötende minse mit ein lekker glaeske beer in de hand.
Noow gebeurt dit zeker ouk waal maar det is neet wao de Joeks veur steit. Eigelik loupe weej as kemissie veur den optoch oét.
Op ‘t moment det idderein nog beej aan ‘t kômme is van de iërste stuupe van de Vastelaovend zoëas Opus Jocus Leedjesaovend, Elf van Elf en de Prônkzitting zien weej alweer bezig mit ‘t Naopraote van ‘t Boéremoosbal, d’n Hofbal, Matinee Musical, de seniorezittinge, ‘t Roeje kruuts bal, ‘t Jeug Vastelaoves Leedjes Konkoer, Vastelaovestoppers, Jocus Pocus, Boerebroélof intoch en ‘t Muts aafzette maar ziër zeker ouk alweer alle evenemente van ‘t jaor daornao.
Weej vraoge ôs dan altiéd aaf wie weej ‘t nog baeter kinne doon, waat vônde de minse leuk, waat waas minder en wao kinne weej ‘t ens anders aanpakke.
As Joeks zörge weej veur de programmering van eigelik alle evenemente van Jocus behalve ‘t Boéremoosbal en d’n Hofbal. Weej zörge neet allein veur de invölling van den aovend maar zörge der ouk veur det de artiste tiédes den aovend zelf opgevange waere, weite wao eur kleikamer is en oppe tiéd op de buun of achter in de zaal zien.
Ouk hebbe weej de regie op de vloer wie det zoë moei hit. As der ônverwachs dinger gebeure zoëas artiste die later zien vanwaege eure drökke agenda of probleme oppe waeg probeere weej det op te losse zônder det de gaste dao ouk maar iets van merke.
Weej ligge de artiste dusdanig in de watte det zeej gaer beej Jocus kômme en aan andere artiste laote weite det ‘t beej Jocus altiéd good optraeje is. Heejdoor kriege weej tiédes de zittinge en bals ouk hiël vuuël gedaon van de artiste. Ein ekstra nummer zinge of sôms ein nummer minder is meistes gen probleem en dit mak ‘t veur ôs ein stök mekkelikker um gater op te völle of um tiéd te winne.
Umdet weej as kemissie haos alle evenemente van den achterkant meimaake is ‘t neet altiéd mekkelik um te oordeile euver de kwaliteit van ein evenement. Dök is de belaeving achter de buun gans anders as in de zaal. De sfeer in de zaal is hiël meujlik te preuve asse op de buun steis of in de artiestekelder verbliefs.
Ein good evenement velt of steit aevel mit de saamewerking tösse de kemissies ônderling, zônder eine moeie zaal (TC en R&T), ‘t gooje en vuuël publiek (P&P), eine gesmaerden inloup en kaartverkoup (AZ) en de entoerage en dekorum op den aovend door Hofkepel, Prinsekepel, Garde en Raod van Elf kin der nog zô’n moei program staon maar zal de sfeer in de zaal der neet zien.
Same mit alle andere kemissies probere weej ‘t moeiste waat Venlo en umstreke haet neer te zitte zoëdet weej nao ein evenement van Jocus allemaol gruuëts kinne zien um deil te meuge oétmaake van dit schoën Gezelschap.