Kiék-ze-rikiki: Inscheete op Elf van Elf

De Venlose pliessie stoof op 11 november 1981 mit hoëge snelheid nao ‘t Julianapark. Aldao aangekômme ware zeej getuuge van waat later zoel bliéke ein nieje Jocus traditie: ‘t Inscheete. Sindsdeen wuurt ‘t nieje Vastelaovessezoen “ ingeschaote” mit 11 saluutscheut.

Op de foto zeen we ‘t inscheete van de Vastelaovend in 1994. ‘t Kenon woord oëits beej ‘t aafbraeke van de vestingwerke gevonde, maar is ein trouw Vastelaovesinstrument dae ‘t kômmende Vastelaovesjaor inluujt.

Door de jaore haer greujde ‘t inscheete oét tot ein waore sirremonie op de Mert veur ‘t Stadhoés wao iddere Venlonaer welkom is. Sinds 2006 is Elf van Elf ein daagdeurend evenement wao d’n aaftrap wuurt gedaon van ‘t  nieje Vastelaovesjaor. Begôs as flauweköl, maar taegeswaordigs neet miër weg te dinke. Want: "Elf van Elf, sprik vanzelf: kump eine joeksige tiéd."

Miër  euver Elf van Elf de historie van Venloosch Vastelaoves Gezelschap Jocus vindt geej op: http://www.jocusvenlo.nl/default.asp?Historie