Jubileumconcert Prinsekepel Jocus 11 jäörig bestaon
‘t Zal ongeviér vieftiën jaor geleeje zien det Bart den Biesen zaliger de wins oetsprook ein kompleet prinsetrio door de stad te zeen loupe veurzeen van zien eige kepel en garde. Wie Piet en Sef Gubbels in 2000 stopde beej de formasie Mix alias de Jocus Hofkepel zoog Bart zien kans schoën en opperde hae zienen druim beej dees hiëre. Die hadde dao waal oére nao en zeej ginge aan de slaag mit recrutere van ein bezetting en alles wat nuuëdig waas um zô’n formasie op te zette. De iërste 12 muzikante waare flot gevônde en Sef begôs mit ‘t schrieve van de nuuëdige arangemente. Ouk ein garde kwaam van de grônd en al flot woord oétgekeke nao geschikde uniforme. Daoveur woord ‘t zuuje oétgekeimp en ein aantal adresse bezôch wao uniforme te koup ware. In Klimmen waas ‘t raak, de schötterie had nieje unforme en deeje eur alde weg op veurwaarde det de ganse partie kompleet gekoch meus waere. Zoë haet Jocus taege eine aantrekkelikke priés 55 uniforme die de kleure van ‘t gezelschap rech deeje en nog in redelikke staot ware.De garde en de kepel ware geformeerd en de rippetiesies en exercisies begôste. In augustus 2001 waas de première van kepel en garde beej de installasie van de nieje vors Joeccius XI, d’n hiër Harry Pouwels.
In de aafgeloupe 11 jaor is ôngeviër de komplete garde en kepel van bezetting gewisseld maar hebbe door aandach en serieuze aanpak ein stevig fundament gekreege. In de beginjaore functioneerde de kepel van oktoëber tot nao de vastenaovend, maar um eine gooje ônderlinge band te bewerkstellige woord beslaote ens in de twië waeke te rippetere en nao weer inkele jaore iddere waek. Zoë kump de kepel iddere vriedaag um zeeve oor beej Copacabana beejein en wuurt stevig gerippeteerd tot neege oor. De kapel haet inmiddels ein oetgebreid rippertoire en telt 22 leeje. ‘t Muzikaal niveau is good en d’r zit laeve in de klup veur de kômmende 11 jaor.
Ter gelaegenheid van dit jubileum guuëf de kepel op halfvastezôndaag 18 miërt van 11 oor tot 1 oor ein gevarieerd concert beej Copacabana op de Luitherwaeg mit meziék van de aafgeloupe 11 jaor, waobeej zelfs ‘t klassiek neet geschuwd wuurt.
Degene die de aafgeloupe 3 jaor op vastelaoveszaoterdaag beej Domani waare, weite waat eur te wachte steit. Dit concert wuurt veur de pauze aafgewisseld mit ein optraeje van Linda Zijlmans det inkele nummers van zien nieje cd luuët huure.Nao de pauze ein bietje remmiedemmie mit zang van Wiel Vestjens, Ingrid Janssen, Jan de Rijk, Hans Mans, Claar Boots en Frans Driessen. Dit veurspelt eine aafwisselende en leuke morge te waere wao ônder ‘t genot van kôffie of wat sterkers ein gevarieerd concert gegaeve wuurt door ein aantal enthousiaste muzikante in spiksplinternieje uniforme.