Jubileum: Pak de 66e Träöt!

Op maondaag 17 fibberwari prissenteert  Venloosch Vastelaoves Gezelschap  Jocus  veur de 66e kiër de Träöt , ‘t officiële staatsorgaan van de vereiniging. Veur dees speciale gelaegenheid is de jubileumeditie in ein verrassend niej jeske gestaoke.

De Träöt haet zich in de aafgeloupe 65 edities ôntwikkeld tot ein Vastelaovesblaad det neet miër weg is te dinke tiédes de Venlose Vastelaovend. In ein döbbeldieke jubileum-oétgave zien de vaste rubrieke aangevöld mit diverse nieje rubrieke. De geteikende advertenties blieve ein waezelik ônderdeil van de 92 pagina’s tellende Träöt.

Ein niej formaot, de nieje sprankelende vormgaeving en nog miër kleurefoto’s zal de laezer perbere te verrasse. Door middel van QR codes wuurt op ein interactieve meneer verweze nao de digitale Jocus kenale wao de laezer beejveurbeeld video’s of ein oétgebreide foto ripportage kan bekiéke.

Mit aandach veur de traditie van De Träöt beoug Jocus mit de kômmende editie de vertrouwde kwaliteit van zien blaad nao ein hoëger niveau te höffe en zoë nog miër laezers  aan te spraeke.

De nieje jubileumoétgave van ‘t meis gelaeze Vastelaovesblaad in Venlo is te koup vanaaf dinsdaag 18 fibberwari 2014. De Träöt kos € 3.00.