Jocus Museum iërt Frans Boermans mit tentoënstelling
In aanluip nao Vastelaovend bringk ‘t Jocus Museum ein ode aan Frans Boermans mit een spesjale tentoënstelling: Theater van ‘t laeve. Deze is te zeen vanaaf zaoterdaag 13 jannewari in ‘t Jocus Museum. In samewerking mit de femilie Boermans wuurt in verschillende tiédsbeelde ein euverzich gegaeve van zien werk.
Nico Tissink, veurzitter van ‘t Jocus Museum: “Frans Boermans (1917 – 1999) waas ein van de meis getalenteerde tekstschriévers dae Venlo vuuel leedjes haet geschônke. Auk teikende hae veur de tekste van ein aantal Venlose Revues. ‘t Volkstheater Frans Boermans is daobeej ein prachtige naolaoteschap waoin zienen druim van ein klein volkstheater mit puur teniël werkelikheid is gewaore. Maar baovenal waas Frans Boermans eine gewoëne, bescheije Venlonaer mit ein enorme kreativiteit. Hae makde vanoét ein ingaeving prachtige tekste en brach de minse enorm plezeer mit zoewaal zien vastelaovesleedjes as mit de revue’s. Vuuel van zien leedjes zien echte evergreens, die generatie op generatie waere doorgegaeve. Zien werk is ‘t bewiés det de Venlose volkscultuur door eur inwoëners zelf wuurt gemak en wie ‘t minse mit mekaar verbindt.”
Natuurlik zien in de tentoënstelling alle Venlose vastelaovesleedjes van Boermans te huuere: van ‘t Fleske (1951) tot en met Vrouw Sloeberjoechems (2002). Daonaevebeej waere auk beelde oét vruugere Venlose Revue’s getuind. Foto’s en tekste oét de verschillende periodes make de tentoënstelling compleet. Sprik veur zich det componiste en artieste wao Frans Boermans mei werkde truuk zien te vinde.
Mit dees tentoënstelling wilt ‘t Jocus Museum neet allein ein ode aan Frans Boermans bringe. Auk wilt ’t Museum op dees wiés de ontwikkeling van ‘t Venloos vastelaovesleed laote zeen en haopelik ein inspiratiebrôn zien veur de vastelaovesleedjes die in d’n toekôms geschreve waere.
De expositie Theater van ‘t laeve mak deil oét van de permanente tentoënstelling De Schatkamer van de Venlose vastelaovend. Heejin kômme onder andere de historie van de Venlose vastelaovend en de Boerebroélof aan bod. Auk kinne in de filmzaal alde vastelaovesbeelde waere vertuind die recent zien gedigitaliseerd.
Wies de vastelaovend is ’t Jocus Museum iddere zaoterdag en zôndag geäöpend. Daonaeve is ‘t meugelik om mit ein gezelschap op aafspraok ‘t museum te bezeuke en te waete rôndgeleid.
Vacature Gasdame/Gashiër Jocus Museum
‘t Jocus Museum is nog op zeuk nao enthousiaste gasdames en/of gasthiëre. Heb geej affiniteit mit de vastelaovend en vind geej ‘t leuk um op äöpeningsdaag in ‘t Jocus Museum ôs gaste rônd te leije? Meld ôg vandaag nog aan via archief@jocus.nl.
Nog miër informatie: www.jocus.nl