Jocus 1842-speldje: exclusief verkriégbaar in Jocus Museum

Vanaaf dit weekend exclusief verkriégbaar in ‘t Jocus Museum: ‘t Jocus 1842-speldje.

‘t Speldje is ein oétbaelding van ‘t alleriérste vereinigingsteike det de Sociëteit Jocus Venlo beej zien oprichting in 1842 instelde: Eine narrekop bestaoke mit Jocusmuts en kraag dae de tông oétstik. Op zien tông is ‘t gekkegetal 11 te zeen. In de iërste jaore woort dit door de Sociëteit Jocus as beeldmerk gebroék. Later woort de Narrekop verruuld veur de Jocushaan.

In zien tentoënstellinge druëg ‘t Jocus Museum de historie van de Venlose Vastelaovend en in ‘t biezonder Jocus oét. Daobeej pas ein passend versiersel det exclusief veur zien bezeukers verkriégbaar is. Door te keeze veur de Narrekop ônderstreep ‘t Jocus Museum taeves ‘t aankômmende 16×11 jäörig jubileum van Jocus op 6 oktober van dit jaor.

‘t Jocus 1842-speldje geldt taeves as ‘t intreebewiés en is veur slechs € 5 inkel-en-allein in ‘t Jocus Museum verkriégbaar. (dus neet verkriégbaar via de Jocus-webshop of andere Jocus verkauppunte)

Äöpeningstieje Jocus Museum:
‘t Jocus Museum – gevestig op ‘t Dominicanenplein in de binnestad – is iddere 1e en 3e zondaag van de maond geäöpend van 13.00 wies 16.30 oor.
Vanwaege ‘t Nationale Museumweekend is ‘t Jocus Museum auk aope op zaoterdaag 14 april en zondag 15 april op dezelfde tieje.
Daonaeve is ‘t museum op aafspraok te bezeuke.