Jocus schuut leedjesschriévers te hölp

Venloosch Vastelaoves Gezelschap Jocus geit leedjesschriévers aan de Veurselectie nog miër ondersteune. Schriévers die mei wille doon aan de veurronde van Opus Jocus kinne vanaaf noow desgevraog ein finansjeele beejdrage kriég van € 66.

Mit dees beejdrage haop Jocus d’n dörpel veur schriévers en kômponiste um leedjes in te steure kleiner te make. “We zeen de aafgelaupe jaore det schriévers naeve kreativiteit, tiéd en energie in ein leedje te staeke, auk steeds dökker koste make um tot ein niej leedje te kômme”, zaet Roel Bisschops as veurzitter van Jocus Joekskemissie. “De inzendinge veur de veurseleksie waere steeds professioneler. Schriévers roope de hölp in van arrangeurs of laote zelfs einen ‘demo’ in einen opnamestudio make. Veur de veurronde is det neet per se nuuëdig, maar weej begriépe auk det schriévers alles oét de kas wille haole um eur leedje op de veurronde al zoë good meugelik te laote klinke.”

Aan professionele hölp zitte koste verbonde. “Det is auk logisch, aevel perbere we auk te veurkômme det nieje schriévers waere aafgeschrokke um deil te neme vanwaege hoëge koste”, zaet Bisschops. ’t Is daorum det Jocus kump mit ein kleine finansjeele beejdrage. Deilnemers die daoveur in aanmerking wille kômme, kinne zich melde beej Jocus. ’t Geit dan um ein beejdrage per leedje.

Mit dees regeling haop Jocus al die schriévers en kômponiste ein klein steuntje in de rök te gaeve. “Daobeej hebbe we ’t zelfde doel veur auge as al die minse die gaer wille meidoon aan de Veurseleksie van Opus Jocus; weer te kômme tot veer joeksige nieje vastelaovesleedjes en daomei de riéke Venlose leedjesköltuur laeventig te halde.

Deilnemers kinne beej eur aanmelding aangaeve of zeej gebroék wille make van dees nieje beejdrage.