Jocus prissenteert zich beej de Keuningsvaart
Tiédes de Keuningsvaart, de toch dae de kersverse Keuning Willem Alexander same mit zien vrouw Keuningin Maxima op 30 april mak op ‘t IJ in Amsterdam, prissenteert ‘t Venloosch Vastelaovesgezelschap Jocus zich vanaaf einen boët aan ‘t nieje keuninklik paar. De gemeinte Amsterdam haet via de oétveurende producent IDTV gevraog of Jocus, as aldste vastelaovesvereiniging van Nederland (opgerich in 1842), tiedes deze Keuningsvaart de vastelaovend in Nederland wilt vertaegenwaordige.
‘t Bestuur van Jocus vind dit ein ziër groëte iér en haet daorum beslaote um op 30 april in vol ornaat nao dees Keuningsvaart te gaon. Eigelik schrief ‘t protocol veur det Jocus zich boéte ‘t seizoen (‘t vastelaovesseizoen löp vanaaf 11 november wies vastelaovesdinsdaag) neet in vol ornaat meug prissentere. “Maar as ‘t hoëgste ceremonieel gezag van Nederland daorum vruuëg, dan is dao gennen inkele regel of verordening taege bestand. We hebbe officieel toestumming gekrege van ‘t bestuur van de Samewirkende Limburgse Vastelaovesvereiniginge (SLV) um tiedes dees unieke gelaegenheid alle versiersele, kraeg en mutse te drage”, aldus Peter Bastiaens, aaftraejende sikkertaris van Jocus. ‘t Venloos Vastelaovesgezelschap zal vertaegewaordig waere door Prins Sef IV (Sef Thissen), zien adjudante, Vors Joeccius XI (Harry Pouwels), de Raod van Elf, de sirremoniemeister, de chef du protocol, de prinsegarde en de dansgarde.
‘t Is euveriges neet d’n iërste kiër in eur 171-jäörig bestaon det Jocus boéte ‘t vastelaovesseizoen in vol ornaat nao boéte traejt. Jaap Stroeken, archivaris van Jocus, haet in de archieve gevônde det op 6 september 1938 Prins Funs I (van Grinsven) same mit sirremoniemeister en inkele raodsleeje aanwezig waas op ‘t Rokin in Amsterdam tiédes ‘t défilé ter iere van ‘t 40-jäörig jubileum van Keuningin Wilhelmina.
De Keuningsvaart vertrek um 19.30 vanaaf ‘t EYE Filmmuseum en zal in ein lus via ‘t Javaeiland nao ‘t meziékgebouw aan ‘t IJ vare. Op ‘t IJ zal ein “dwarsdoorsnee”van ‘t maatschappelik laeve in Nederland en Nederlandse euverziëse gebiede zich op buuët prissentere aan ‘t keuninklik paar. Heejbeej vorme kuns, cultuur en sport d’n baovetoën. Zoë zulle ônder andere ‘t Nationaal Ballet en de Nederlandse Opera ein oétveuring gaeve. Armin van Buuren en ‘t Koninklijk Concertgebouw Orkest gaeve op de kop van ‘t Javaeiland ein uniek concert. D’r is einen boët mit Olympisch golde medaljes en einen boët mit dao op, in vol ornaat, de aldste vastelaovesvereiniging van Nederland, ‘t Venloosch vastelaovesgezelschap Jocus. De Keuningsvaart wuurt rechstreeks oétgezônde door de NOS.