Jocus Prinsegarde
Op ‘t aanstaonde Hofbal mak Vors Joeccius XI waereldkundig wae deze Vastelaovend de scepter euver ‘t Jocusriék zal zweie. Alzoë ‘t antwaord op de belangriékste vraog wao gans Venlo ‘t in dees daag euver haet: wae wuurt de nieje Stadsprins van Venlo en wae waere zien Adjudante?
Zeet geej de pluume van de Gardiste van Jocus Prinsegarde baove de minse oétkômme dan kin ‘t Jocus Dreejspan neet wiéd weg zien. Wae is Jocus Prinsegarde en waat doon zeej? Jocus Prinsegarde is same mit Jocus Prinsekepel opgerich op 26 augustus 2001 beej gelaegenheid van de installatie van Harry Pouwels as Vors Joeccius XI. Ouk kômmende Vastelaovend staon zeej klaor um ‘t Jocus Dreejspan beej te staon.
Jocus Prinsegarde besteit oét ein aantal jônge en enthausiaste Gardiste wao, net wie beej idder Jocus-lid, de Vastelaovend door ‘t blood struimp. As beschermers van Prins Carnaval en zien Adjudante zien zeej te herkinne aan eur uniforme oétgerös mit Garde-pluum en sabel. Vanaaf ‘t vertrek beej de Prinselikke residentie wiés ‘t ind van ‘t program döks in de late eurkes staon zeej klaor um veur ‘t Jocus Dreejspan de waeg vreej te make.. Aan ‘t ind van de aovend wuurt d’r döks nog efkes naogepraot. Daonaeve verzörge zeej ouk ein aantal praktische take en zörge zeej d’rveur det eur niks kint euverkômme. Ouk tiédes de Vastelaovesdaag wieke zeej gen moment van eur ziéj.
‘t Prinselik Dreejspan van Venloosch Vastelaoves Gezelschap Jocus perbeert zich in eur regeerperiode op zoëvuuël meugelik gelaegenhede in Venlo te laote zeen. Dageliks hebbe zeej ein drök program wao zeej ônder andere de Jocus evenemente en bals bezeuke, maar ouk de verschillende zuster Vastelaovesvereiniginge, bejäördezittinge, de jeug vastelaovend en andere gelaegenhede.
Veur de Gardiste is dit ein korte intensieve periode, maar tegeliék ouk unieke periode um de Venlose Vastelaovend van binne-oét mei te make. Beej iddere gelaegenheid wao ‘t Prinselik Dreejspan van Jocus zich tiedes eur Regeerperiode in ‘t Jocusriék laote zeen zörge de Gardiste det ‘t Jocus Dreejspan ziene joeksige gangk kint gaon.
De letste jaore haet Jocus Prinsegarde laote zeen zelfs eine kweekviéver te zien veur Jocus. Al inkele maole zien Gardiste doorgestruimp nao ein van de werkende kemissies van Jocus. ‘t Aafgeloupe jaor had ‘t Dreejspan zelfs eine ald Gardis as Adjudant… Ouk deze Vastelaovend belaof ‘t weer eine joeksige tiéd te waere. Wae ‘t Prinselik Dreejspan van Jocus wuurt det blief nog efkes geheim. Maar vanaaf ‘t Hofbal zörg Jocus Prinsegarde det zeej Venlo meuge veurgaon op eur eige Venlose wies…
Liek ‘t dich tof um mit Jocus Prinsegarde de Venlose Vastelaovend van binne-oét mei te make? Steur dan ein berich mit motivatie nao garde@jocus.nl.