Jocus Prinsegarde mit vertrouwe de toekôms in
Op Elf van Elf jôngsleeje is Funs Slaats geïnstalleerd as nieje Garde Kômmendant van Jocus Prinsegarde. Raeje genôg um mit ald Prins Sef IV, de nieje Chef du Protocol en de nieje Garde Kômmandant euver Jocus Prinsegarde te spraeke.
Sinds zien oprichting in 2001 is Jocus Prinsegarde oétgegreujd tot ein ônderdeil van Venloosch Vastelaoves Gezelschap Jocus det neet miër is weg te dinke. Funs Slaats vertelt: "ôs houftaak is um ‘t Jocus Dreejspan te begeleide tiédes eur regeerperiode en veur eur de waeg vreej te make zônder det weej daobeej zelf op de veurgrônd staon. Idder jaor is ‘t ein intensieve maar veural leuke periode, waobeej desse de Vastelaovend in gans Venlo same mit ‘t Jocus Dreejspan belaefs. Daonaeve is ‘t leuk um te zeen det we de letste jaore ouk ein van de kweekviévers van Jocus zien gebleeke. As nieje Garde Kômmandant vind ik ‘t ein moeie oétdaging um mich dao veur in te zette en de Garde mit nieje initiatieve door te laote greuje.”
Ald Prins Sef IV haet biézôndere herinneringe aan Jocus Prinsegarde: “ôs Regeerperiode waas einen onvergaetelikke tiéd dae weej de res van ôs laeve mit ôs meineme. Same mit Jocus Prinsegarde hebbe weej eine geweldige tiéd gehad. Van te veure wiste weej iérlik gezag neet waat weej van de Garde meuste verwachte. Aevel, ein oor nao ôs oétrope op ‘t Hofbal keeke weej as Dreejspan ôs same al aan. Wie gek ‘t ouk klink, maar de Gardiste zien ech eine ônmisbare steun in de rök. Zeej make de waeg veur dich vreej, halde dich in de smiéze en dich kins veur de kleinste dinger op eur truuk valle as det nuuëdig is. Same mit de andere leeje van ‘t Jocus gezelschap goove zeej ôs de ruumte um de Venlose Vastelaovend veur te gaon zoëas weej det hebbe kinne doon. ”
Door de jaore haer is de rol van Jocus Prinsegarde miër volwasse gewaore. Det beaamp ouk Mark van Soest, de nieje Chef du Protocol van Jocus en zelf 8 jaor lang Gardis. Mark völt aan: Jocus Prinsegarde is veural eine leuke vrindegroep mit ein toegevoogde waerd waat ‘t theater van klatergold en parelwien van Jocus kompleet mak. Daonaeve is de Prinsegarde ouk alsmaar miër ein herkinningspunt det aanguëf det de Stadsprins mit zien Adjudante in aantoch is. De Gardiste verstaon ouk op ein ander wiés eur vak. In de begeleiding neme zeej op diverse momente werk veur de Chef de Protocol oét hand, waat ‘t de Chef ouk mekkelikker mak. Zeej begriépe ‘t spelke en weite waat op bepaolde momente verwach wuurt. Det bringk ouk ‘t Dreejspan rös.
Funs geit vaerder: "Weej hebbe op dit moment ein enthousiaste groep wao weej noow al oétkiéke nao ‘t kômmende Hofbal. As schakel tösse de Gardiste, Jocus en ‘t Dreejspan wil ik dao gaer ‘n dauw in de richting gaeve um de volgende stappe te zette. Weej bliéve veur de toekôms in bewaeging. De Vastelaovend is ‘t moeiste fees det Venlo haet. Det op dees wiés te belaeve bliéf uniek. Waallich greujt dao in de toekôms nog waal ein gelaegenheid waobeej ouk Jocus Prinsegarde kin meihelpe um bepaolde evenemente mei te organisere mit beejdrages van inkele Gardiste. Beejveurbaeld veur de jeug of waat anders. Daodoor wuurt d’n band dae weej, ouk mit andere kemmissies van Jocus, hebbe allein maar sterker. ôs houftaak bliéf netuurlik um ‘t regerend Dreejspan te begeleide. Weej kinne haos neet wachte wiés ‘t Hofbal…"
Jocus Prinsegarde haet ouk zien eige Facebook pagina: https://www.facebook.com/jocus.prinsegarde