Jocus Pocus; Zing mei mit KaraYokeZ B.V.

Op zondaag 19 fibberwari kin de Venlose jeug same mit eur vaders, mooders, opa’s en oma’s in de Maaspoort geneete van ‘n ech vastelaovesprogramma veur en door kinder. Geliek nao de Kinderoptoch start in ‘t Venlose theater ‘n hiel gevarieerd programma. De aafgelaupe waeke hebbe kinder zich kinne opgaeve um same mit Lex Uiting en zien band KaraYokeZ B.V. te zinge. Uiting haop op dees menier kinder enthousias te kriege veur de Venlose leedjescultuur. Messchiens zit d’r waal ‘n zenger of zengeresje beej wao we de kômmende jaore nog vuul euver zulle huure. Opgaeve kin nog altied! Daonaeve kinne kinder mit eur eige meziekinstrument meispeule mit Zoemaar XXS.

Naeve de KaraYokeZ B.V. is d’r veur de kinder vuul dans, zang en meziek. De dansgroep van de Madsonclub zal ‘n spectaculaire show gaeve. D’r is ‘n verkleidwedstried wao kinder tiedes ‘n defilé eur kreatieve kreasie kinne laote zeen. Daonaeve zörge Bram en Ruud op eur bekinde energieke wies veur ‘n echte feesstumming. Maar auk niej talent is present wie de kinder van de Zuidstroom, winnaer van ‘t Jocus Jeugsvastelaoveskonkoer 2011 en de winnaers van de Herfshane, Lisa en Roos. Netuurlik ontbraeke de veer winnende Jocusleedjes neet op Jocus Pocus en zal ‘t jeugdige dreejspan van Jocus auk acte de presence gaeve. De muzikale umliesting is in hand van Jocus’ eige Hofkepèl en Joekskepèl Neet Um Aan Te Huure.

De Jocus Pocus is een echte femiliemiddaag. De entree is gratis.