Jocus Pocus; Wae haet de Joeksfactor?

In naovolging van de vuule talentejachshows op tv, prissenteert Jocus op zondaag 5 miërt zien eige talentejach tiedes de Jocus Pocus in de Maaspaort. Onder leiding van Lex Uiting geit Jocus op zeuk nao de jông of ‘t maedje mit “de Joeksfactor”. De Jocus Pocus begint geliek nao de kinderoptoch dae vanaaf 12 oor door de Venlose straote trek. De toegang is veur lau, maar netuurlik is ‘t drage de nieje “Opstaeker” gewins.

Naeve de Joeksfactor is d’r dans, zang en meziék veur en door kinder. De Jocus Pocus is ‘nnen echte familiemiddaag. De “Tanzgruppe Jan von Werth” oét Kölle zal ‘n spektakulaire show gaeve. D’r is ‘n heuse verkleidwedstrijd. Bram en Ruud zulle op eur bekinde energieke wiés veur ‘n echte feesstumming zörge. Maar auk niej talent duit van zich spraeke wie de kinder van de Koperwiek, winnaer van ‘t Jocus Jeugsvastelaoveskonkoër. Netuurlik ontbraeke de veer winnende leedjes van Jocus neet op Jocus Pocus en zal ‘t dreejspan auk aanwezig zien. De muzikale omliésting is in hand van de Hofkepèl.

Euveriges zien d’r nog kaarte te kaup veur de Kôffietuiterie van dinsdaag 16 fibbwari. De kaarten kôste €7,50 en zien nog te kaup beej Sporthoés Olympia aan de Groëte Baekstraot 1 in Venlo.