Jocus Pocus: vastelaovend veur jôngk en ald

Op zôndaag 15 fibberwari begint direk nao de kinderoptoch, in de Maaspoort, Jocus Pocus. Dit joeksige evenement veur ‘t ganse gezin haet ouk dit jaor ein gevarieerd programma veur jônk en ald. Wie in veurgaonde jaore meuge de kinder in de zaal eur vastelaoveskunste tuine op ‘t podium.

De Jocus Pocus is einen echte familiedaag mit vuuël dans, zang en humor door kinder gebrach. Dansgroep de Jump and Jazz zal veur ein spectaculaire show zörge. De Kwante Hippe zulle weer op eur kompleet eige wiés op Jocusbuun danse. Vuuël niej talent velt te bekiéke beej Jocus Pocus. Zoë zulle de winnaers van de Vastelaovestoppers en de Herfshane acte de présance gaeve. Vanzelfspraekend ôntbraeke de veer nieje Jocusleedjes neet ônder de musiale begeleiding van Jocus’ Hofkepel. Joekskepel Neet Um Aan Te Huure (Nuath) en Joekskepel Hölster Heinke zulle de stumming in de zaal nog vaerder opschroéve. ‘t Guf ein pôppekastshow van Toffe Tielke. Netuurlik kômme de kersverse Dreejspanne van Jocus en Jocus Toekôms op bezeuk.