Jocus Pocus mit de Höltermenkes

Op zôndaag 2 maart begint geliék nao de kinderoptoch in de Maaspoort Jocus Pocus. Dit joeksige evenement veur hiël ‘t gezin haet dit jaor ein ziër gevarieerd programma veur jôngk en ald. Net wie veurgaonde jaore meuge ouk de kinder in de zaal eur vastelaoveskunste laote zeen op ‘t podium. Dit jaor ônder de bezielende leiding van de Höltermenkes.

De Jocus Pocus is einen echte femiliedaag mit vuuël dans, zang en humor veur en door kinder. De dansgroep de Wuilus oét Velde zal veur ein spectaculaire show zörge. Vuuël nie talent is te zeen beej Jocus Pocus. Zoë zulle de winnaers van de Vastelaovestoppers en de Herfshane acte de presence gaeve. Oéteraard ontbraeke de veer nieje Jocusschlagers neet. Joekskepel Neet Um Aan Te Huure (Nuath) en de band Nog naat achter de oére zörge veur ein echte vastelaovesstumming in de zaal. D’r is ein pôppekasshow van Toffe Tielke. Oéteraard kump ‘t kersverse dreejspan van Jocus en Jocus Toekôms ouk op bezeuk.