Jocus op zeuk nao biezondere vastelaovesfoto’s

‘n Niej initiatief van Jocus mak ‘t meugelik um vastelaovesfoto’s in te steure. Jocus is daoveur op zeuk nao moëije, ontreurende, gekke, kleurriéke of karnavaleske foto’s, die gemaakt zien tiedes de vastelaovend.  ‘n Seleksie van de leukste foto’s krieg beejveurbeeld ‘n plaats in De Träöt, ‘t offisjele staatsorgaan van Jocus, det twië waeke veur de vastelaovend oétkump. Maar auk op ‘t thoésblaad kinne de foto’s geplaats waere. Dao naeve beej besteit de meugelikheid det ‘n biezondere foto truuk te zeen is op ‘n poster. Beejveurbeeld um ein evenement aan te kondige.

‘t Ideej kump van de Pers & Propeganda kemissie en redaksie van De Träöt. Vruuger leepe d’r tiedes de vastelaovend euveral fotograve um vastelaovesvierders te fotografere. Nao ‘t make van ‘n foto kreegse dan ‘n bunke mit ‘n nummer, zoëdetse nao de vastelaovend de betreffende foto’s kôs gaon bekiéke en eventueel kaupe. Taegewoordig zit d’r in idder mobiletje ‘n fotocamera. Gevolg is det d’r tiedes de vastelaovend tiëndoézende foto’s waere gemak.

Jocus wilt de vastelaovend neet allein zeen door de lens van de Hoffotograaf. Weej wille auk de minse in de straot de gelaegeheid gaeve um te toëne wie Venlo vastelaovend viert. Dus: kiék ens nao ‘t veugelke en zet dichzelf in de Träöt!

Foto’s kinne waere ingesteurd via ‘n spesjale pagina op ‘t thoésblaad: www.jocus.nl/foto