Jocus ôntvingk Keuninklikke erepenning
Op vriedaag 5 oktober haet Venloosch Vastelaoves Gezelschap Jocus de Koninklijke Erepenning meuge ôntvange. Op ein biézondere Algemeine Leejevergadering van Jocus woort dit Keuninklikke iéreteiken oétgereik door börgemeister Antoin Scholten.
Veurzitter Roel Versleijen: “De vereiniging woort kompleet verras mit dees Keuninklikke erkinning. De leeje van Jocus ware in vergadering beejein um d’n aaftrap van ôs 16×11 jäörig jubeljaor te viere. Wies det ôzze börgemeister Antoin Scholten inbrook en ‘t groëte niejs mit ôs deilde.”
Jocus kreeg ‘t iéreteiken veur zien jaorelange verdeenste veur de Venlose gemeinschap. Venloosch Vastelaoves Gezelschap Jocus is opgerich op 6 oktober 1842 en daomei ‘t aldste vastelaovesgezelschap van Nederland. Sinds zien oprichting 16×11 jaor geleeje zet de vereiniging zich in veur de stad Venlo um, zoëas zien statute det beschriéve: de Venlose vastelaovestraditie in stand te halde en te bevordere. Dit duit zeej onder miër door ‘t organisere van optochte, bals en vuuël miër uutinge die aan dit doel beejdrage. Venlo is sinds de oprichting ein belangriék en ônlosmakelik ônderdeil van ’t DNA van ôs stad.
Roel Versleijen: “Dees Keuninklikke erkinning is ein biezônder gebaar en ein ôngeluifelik kompliment veur al ôs leeje die zich ‘t ganse jaor door inzette um de Venlose vastelaovend mei meugelik te make.”
Dit weekend äöpende Jocus zien 16×11 jäörige jubeljaor mit ein biézondere Algemeine Leejevergadering op vriédaag 5 oktober. Op ziene gebaortedaag 6 oktober viere de leeje fees op eine speciale leejendaag. Auk de Venlonaere zulle op verschillende wiezes betrokke waere beej ‘t jubileum. Op zondaag 7 oktober äöpent de nieje tentoënstelling Dit is Venloos roem in ‘t Jocus Museum. Wies de vastelaovend van 2019 steit de historie van de Venlose vastelaovend, mit de vastelaovesleedjes, de Groëten Optoch en de Boerebroélof, in ‘t middelpunt.
Andere hoëgtepunte zien de Jocus Jubel Gala Prônkzitting op zaoterdaag 17 november en ‘t Krense veur Nappes op zôndaag 3 fibberwari, ein speciale Jocus jubeleditie van Nappes op de Proms.
De vastelaovesvierder wuurt auk nog op ein aantal andere verrassinge getrakteerd, aevel heejeuver later miër.