Jocus’ Naopraote start mit Boerefemilieoptoch

‘t Tradisionele ‘Naopraote’ daags nao ‘t Boeremoosbal, op zondaag 22 jannewarie a.s. in de Maaspoort, begint met ‘n ‘Boerefemilieoptôch’. De leeje van ‘t Venloosch Vastelaovesgezelschap Jocus, wao onder de verschillende kemissies en de Raod, en ‘n aantal andere vastelaovesvereiniginge oét Venlo verzamele zich in verschillende Venlose kefees um vandao oét in ‘n ‘Boerefemilieoptoch’ nao de Maaspoort te trekke.

‘t Naopraote môt ‘nnen echte boerefemiliedaag waere wao gezinne mekaar kinne treffe op de van aldshaer meis karakteristieke veuraovend in de geschiedenis van de Venlose vastelaovend. “Dees middaag môt ‘n boeresfeer hebbe. Vandao ôzzen oproop aan de bezeukers um dees sfeer tot oétdrökking te laote kômme in eur kleiding. Kôm in dien beste boéreploéte”, alzoë Joep Schouren, de nieje veurzitter van de P&P van Jocus.

De Joekskemmissie van Jocus haet ‘n gevarieerd programma samegesteld mit vuul live vastelaovesmeziek . ‘t Nieje ronde zaalpodium, waat veur ‘t iërs gebroék is tiedes de Opus Jocus zörg d’rvoor det ‘n groët gedeilte van ‘t programma zich tösse ‘t publiek afspeult. Netuurlik zien d’r auk optraejes op ‘t zie- en haufdpodium. In deze aafwisselende sfeer kin idderein op gehiël nieje wiés gaon geneete van artieste wie Bram en Ruud, de kinder van basisschoël de Zuidstroom, dansgroep Madson Klup en de winnaer van de Herfshane. Netuurlik zulle de veer winnende leedjes van Jocus neet ontbraeke. Daonaevebeej zien d’r twië joekskapelle die samen mit de Hermeniekepel voor de echte ‘boerefemiliedaagsfeer’ zulle zörge. DJ Ruud Selen zal same mit verschillende artieste op ‘n gehiël nieje meneer dees middaag knallend aafsloéte.

De haufrol op dees middaag is weggelag veur ‘t boerebroélofsgezelschap van de ‘femilie Pollux’ det zich op dees middaag zal prissentere, naodet zeej tiedes ‘t Boeremoosbal al in ‘ondertrouw’ zien gegaon.

‘t Naopraote begint um 13 oor en de entree is gratis. ‘t Drage van d’n Opstaeker is gewins.