Jocus äöpent museum in de binnestad

Venloosch Vastelaoves Gezelschap Jocus äöpent ein permanent museum in de Venlose binnestad. Heejmit geit eine langgekoesterde wins van de vereiniging in vervölling.           

 ‘t Jocus Museum woord zôndaag 4 september as symbolisch cadeau aangebaoje aan Harry Pouwels beej zien afscheid as Vors Joeccius XI/veurzitter van de Venlose vastelaovesvereiniging.

 

‘t Jocus Museum wuurt gevestig op ‘t Dominicaneplein in de Venlose binnestad en wuurt ein plek wao de geschiedenis van de Venlose vastelaovend en de historie van Jocus zichbaar waere gemak. Roel Versleijen, Vors Joeccius XI/veurzitter: “Jocus hech erg aan tradities. De wiés wao-op ’t fees in Venlo geviërd wuurt, de leedjescultuur, de boerebroélof en nog zoevuuel miër gaeve ôzze vastelaovend eur eige gezich. De historie speult dao-in ein haufdrol, det sprik veur zich. Vastelaovend is ‘t fees desse veur alles tiedes de dreej daag môt belaeve. ‘t Jocus Museum wuurt ein plek wao de Venlose volkscultuur centraal steit. De ôntelbare verhaole en tasbare veurwerpe van dit iëuwenalde fees môtte ‘t unieke Venlose vastelaovesgeveul tot laeve bringe en zoë inspiratie gaeve aan de Vastelaovend van morge en euvermorge. We wille ‘t museum gaer toegankelik make voor klein en groët. En we kiéke wiejer as allein Vastelaovend.” 

 

In de kômmenden tiéd wuurt ‘t museumplan vaerder oétgewerk. ‘t Museum zal neet inkel op vaste momente geäöpend zien, maar ’t zal auk meugelik zien om op aafspraok as groep ein bezeuk te bringe. De vereiniging wilt bezeukers op ein creatieve en educatieve wiés achtergronde achter de Vastelaoveshistorie laote belaeve. Neet allein door ‘t tentoënstelle van archiefstökke, ook diverse beeld- en geluudsfragmente zulle de vruugeren tiéd weer tot laeve wekke.

 

‘t Jocus Archief haet in de aafgelaupen 15 jaor vuuël ervaring opgedaon. In 2007 woord, bij gelaegenheid van ‘t 15×11 jäörig Jocus jubileum, in Domani ein expositie gehalde. ‘t haet de zichbaarheid en aandach veur de geschiedenis van de Vastelaovend vergruuët. Jaap Stroeken, veurzitter van ‘t Jocus Archief, ônderdeil van Jocus’ P&P kemissie: “In de stad is ein enorme interesse in de Venlose historie. Middels de jubileumexpositie hebbe we as vereiniging laote zeen wie ziër Jocus dao-aan gehech is. ‘t Verleeje vormp de basis van ‘t fees det ôs dreej daag per jaor in ziene greep hild. Daonaeve hebbe we in recente jaore al diverse schoën stökker aan de archiefcollecties meuge toeveuge. Weej verzörge geregeld rôndleidinge in ‘t Jocuspand aan de Börgemeister Conraedtzstraot. Dao aevel zien ôs meugelikhede erg beperk. 

 

Mit ‘t äöpene van ‘t Jocus Museum wille weej dao gaer vaerder op inspeule en ein beejdraag levere um ‘t fundament wao-op de Vastelaovend geviërd wuurt te vergruuëte.”

 

Oétintelik môt ‘t Jocus Museum ein permanente plek kriége in de binnenstad en in de Venlose gemeinschap. Ein spesjaal comité is de planne op dit moment aan ‘t oétwerke. ‘t Doel is um binne inkele maond de deure te kinne äöpene.