Jocus Museum ôntdek historische foto’s Limburgse vastelaovend
’t Jocus Museum haet ein unieke fotoserie ôntdek oét ’t ind van de 19e iëuw. ’t Zien de aldst bekinde foto’s van de 4 groëte stadsvastelaovesvereiniginge oét Limburg vereinig en gemak tiédes ein bezeuk aan Amsterdam. De originele foto’s en eur verhaol zien vanaaf noow te zeen in de niejste tentoënstelling ‘Vastelaovend in Venlo’.
Ein bezeuk van Jocus aan Amsterdam in 1898, eine zilvere penning en dreej foto’s oét ’t recent gedigitalisseerde Jocus Archief: zeej vorme neet allein ein ludiek verhaol, aevel áúk ein historisch moment oét de geschiedenis van de Limburgse vastelaovend.
“’t Leuke is det ein foto die weej good dachte te kinne ein kômpleet ander verhaal haet. Dankzij niej archiefmateriaal det digitaal beschikbaar is, kreege weej ein baeter beeld en kinne weej de historie kompleter make.” aldus Jocus archivaris Jaap Stroeken.
Nao einen tip van carnavaloog Theo Franssen onderzoch ’t Jocus Museum ein al bekinde foto die zoel zien gemak tiédes ein bezeuk van Jocus aan Momus in Mestreech in miërt 1899. Volges Franssen vond d’r in 1899 gen bezeuk plaats en det klop. ’t Onderzeuk löp via onder andere de Keuninklikke Bilbliotheek in Den Haag, ’t Historisch Centrum Limburg en ’t Stadsarchief van Amsterdam.
Stroeken ônthölt ’t ‘echte’ verhaol: “Jocus ging in juni 1898 op bezeuk beej de Limburgse Sociëteit Limburgia in Amsterdam, ein vereiniging veur Limburgers die dao woënde en werkde. ’t Woort ein dreejdaags bezeuk aan de haufdstad ter gelaegeheid van eur tiënjäörig jubileum. Op zaoterdaag 25 juni waas d’r in ’t Sociëteitslokaal op de Kalverstraot eine feesoavend. Op zondaag 26 juni volgde ein oétstepke mit ’t ganse gezelschap nao IJmuiden, Beverwijk en Wijk aan Zee. Ein iërste foto woort gemak aan de havekaaj van IJmuiden en de twië groepsfoto’s woorte gemak beej ’t Ooster Badhuis in Wijk aan Zee. Weej hebbe hilarische verslage oét de Venloosche Courant truukgevônde, maar auk foto’s van de locaties die woorte bezoch. Waat ’t extra leuk mak is det weej same mit Theo Franssen miërdere minse koste identificere. Dit verhaol guuëf ein kompleter beeld euver Jocus in dees markante periode die later ein inspiratie vörmde veur de vereiniging.”
Tiédens ’t onderzeuk bleek neet allein det de foto neet in Maastricht woort genaome, maar dus auk ein jaor alder is as tot noow toe woort aangenaome. Mit de kinnis van noow is ‘t ein van de aldste foto’s wao naeve Jocus auk Momus oét Mestreech, de Marotte oét Sittard, de Flarussen oét Remund en de Limburgse Sociëteit Limburgia oét de haufstad te zeen zien. En d’r bleke miërdere foto’s van dees gelaegeheid te zien gemak.
Auk de veurzitter van ‘t Jocus Museum Renier Linders is vergöld mit ‘t ônderzeuk: “Ik heb de foto’s jaore geleeje zelf gedigitaliseerd en ingekleurd. Inkele details op de foto goove d’n doorslaag. Waat ‘t extra leuk mak is det weej in ôs Jocus Museum neet allein ‘t ganse jaor door bezeukers ôntvange, maar auk steeds miër zelf ônderzeuk doon nao bepaolde ônderwerpe. Daodoor kinne weej auk nieje verhaole mit bezeukers deile.”
Tentoënstelling ‘Vastelaovend in Venlo’
De dreej originele foto’s en eur verhaol zien noow te zeen in de tentoënstelling ‘Vastelaovend in Venlo’ van ‘t Jocus Museum. De tentoënstelling bringk talloze unieke momente van de Venlose vastelaovend en Jocus in beeld. Ludieke verhaole en anekdotes bringe de riéke historie van ônder andere de Boerebroélof, de Groëten Optoch en de vastelaovesleedjes tot laeve. Auk is d’r ein jubileum expositie van Vastelaovesgezelschap De Kwas oét Venlo-Zuud te zeen. Ter iëre van eur 66-jäörig bestaon is ein speciale mini-tentoënstelling ingerich.
‘t Jocus Museum is wies vastelaovend weer iddere zondaag geäöpend van 13.00 wies 16.30 oor.
Auk is ‘t meugelik um op afspraok ein rondleiding te volge. Ervare Museumgidse neme de bezeuker mei op reis door de geschiedenis van de Venlose vastelaovend en Jocus. In de filmzaal van ‘t Jocus Museum zien de recent verworve vastelaovesfilms oét 1939 en 1947 te zeen. Zeej gaeve einen unieke inkiék in de vastelaovesvieringe rondum de Twiëde Waereldoorlog.
Miër informatie: www.jocusmuseum.nl
