Jocus Museum in Museumwaekind aop

‘t Jocus Museum is in ‘t museumwaekind op allebei de daag geäöpend. Op zaoterdaag 14 april en zôndaag 15 april is
                                         “de Schatkamer van de Venlose vastelaovend”
weer te bewôndere. Vanaaf det moment, wies aan de zomervakantie, iddere 1e en 3e zôndaag van de maand aop.

In ‘t Jocus Museum is auk De tentoënstelling Theater van ‘t laeve te zeen. Dees ode aan Frans Boermans mak deil oét van de permanente expositie De Schatkamer van de Venlose vastelaovend. Dao in kômme ônder miër de historie van de Venlose vastelaovend en de Boerebroélof aan bod. In de filmzaal dreijt ein veurstelling van alde vastelaovesbeelde, die recent zien gedigitaliseerd. Enthousiaste gasdames en gashiëre zulle gaer ôg vraoge beantwaorde.

Geej vindt ‘t museum aan ‘t Dominicanenplein in de Venlose binnenstad en is op eur äöpeningsdaag te bezeuke van ein oor ‘s middaags wies half viéf. Gezelschappe kinne zich aanmelde veur ein rôndleiding -boéte de gebroékelikke äöpeningsore van ‘t Jocus Museum- via jocusmuseum@jocus.nl.

In de afgelaupe periode hebbe ‘t Jocus Archief en ‘t Jocus Museum inkele unieke collectiestökke aan de archief/museumcollectie van Jocus kinne toevooge, dankzij de vreejgaevigheid van bezeukers. Minse, die stökke van welken aard dan auk, in broékliën dan waal as schinking aan ôs beschikbaar wille stelle verzeuke weej dit via jocusmuseum@jocus.nl kinbaar te make.