Jocus Museum äöpent zien deure mit iërste tentoënstelling
Op zondaag 29 jannewari äöpent ‘t Jocus Museum feestelijk zien deure. De äöpeningshandeling wuurt verrich door ald Vors Joeccius XI d’n hiër Harry Pouwels. Vervolges zal hae ‘t boerebroédspaar van Boerebroélofsgezelschap Den Hulster as iërste bezeukers welkom heite. De “Schatkamer van de Venlose Vastelaovend” geit aope…
De iërste pop-up tentoënstelling steit in ’t teike van de parels van de Venlose Vastelaovend: de iëuwe alde Boerebroélof, ‘t Venloos Vastelaovesleed en de alde historie van ‘t volksfeest staon in de schienwerpers. Ouk wuurt de historie van Venloosch Vastelaoves Gezelschap Jocus, opgerich op 6 oktober 1842 en daomei ’t aldste vastelaovesgezelschap van Nederland, getuuënd. Taeves is d’r aandach veur de jeugvastelaovend en is, in ein speciaal veur ‘t museum gemak auditorium, ein oétgebreid filmprogramma te zeen.
Veurzitter Nico Tissink: “Mit dees iërste pop-up tentoënstelling wilt ‘t Jocus Museum de Vastelaovend alves tot laeve bringe en ein inspiratiebrôn zien veur ’t fees det ôs straks weer dreej daag in ziene greep helt. D’r is in eine korten tiéd eine heuse wervelwind aan kreativiteit ôntstaon. Idderein haet zien schouwers d’r onder gezatte um d’r waat moeis van te make. ‘t Museum is d’r veur idderein: neet allein de vastelaovesvierder is welkom, aevel auk idderein mit ein breie interesse veur de Venlose cultuur en zien historie.
‘t Jocus Museum is wies Vastelaovend op zaoterdaag- en zondaagmiddaag geäöpend veur publiek. Daonaeve is ’t meugelik um op aafspraok ein rondleiding te kriége. Mit ’t äöpene van ein permanent museum wilt ‘t Jocus Museum ein beejdrage levere um ’t fundament wao-op de Vastelaovend gevierd wuurt te vergruuëte.
Nico Tissink: “Nao Vastelaovend wuurt ‘t museum alweer klaorgemak veur de volgende tentoënstelling. In dit kônsep kreeëre weej mit ein andere inrichting ouk ruumte veur wisseltentoënstellinge en kômme weer andere facette van ‘t fees in Venlo aan bod. Dan wille weej beejveurbeeld mit “Virtual Reality” ’t fees tot laeve bringe. Daoveur zien de aafgelaupe maonde al unieke opnames gemak en auk in de kômmende waeke volge nog ein aantal opnamemomente. D’r wuurt zelfs gewerk aan ein speciaal program um de jeug aktief te betrekke.”
‘t Jocus Museum is gevestig op Dominicanenplein 25 in Venlo, gelaege naeve Domani en is ein kedo van Venloosch Vastelaoves Gezelschap Jocus aan ald Vors Joeccius XI d’n hiër Harry Pouwels. ‘t Museum wuurt ein plek wao de Venlose volkscultuur, mit de Vastelaovend in ‘t biézônder centraal zal staon.
Veur äöpeningstieje en miër informasie: www.jocus.nl