Jocus’ Matinee Musical 2011

Minsekinder, Herm en Bert Pollux en Van Gelder speule op zondaag 20 fibberwari tiedes ‘t Matinee Musicale in de Maaspoort in Venlo. Minsekinder behoof nauwelijks ‘n introduksie. Al miër as 20 jaor staon ze op ‘t podium en zörge zeej veur de typische salsa-echtige Venlose leedjes. Herm en Bert Pollux weite wie ze ‘n zaal op de kop môtte zette. Dao zörg eur energieke aanpak van tal van Venlose evergreens veur. Van Gelder is ‘n Venlose dialekband dae is veurtgekômme oét de Herfshane.

‘t Matinee Musicale, det daags nao ‘t Hofbal plaats vindt, is de aafgelaupe jaore oétgegreujd tot ‘n evenement vol dans, zang en meziek. ‘t Jocusevenement begint um 14 oor, nao de prinserecepsie, en de toegang is gratis. Al wuurt ‘t drage van de niejen Opstaeker, te kaup in de Maaspoort, door Jocus ziër gewaardeerd.

Naeve de geneumde artieste haet ‘t Matinee Musicale netuurlik miër. ‘t Kersverse nieje dreejspan van Venlo zal zich aan ‘t publiek prissentere. Maar auk niej talent zal van zich doon spraeke. Zoë zulle de Herfshane weer van de partiej zien en guf de winnaer van ‘t Jocus Jeugsvastelaoveskônkoer, de kinder van de Koperwiek, acte de presence. Netuurlik kin ‘t publiek auk geneete van de veer winnende Jocusleedjes en zulle de minse getrakteerd waere op dans en acrobatiek van dansgroep Calypso.