Jocus’ Matinee Musical 2011

Wir sind Spitze, de Toddezek en de Hofkepèl speule op zondaag 5 fibberwari  tiedes ‘t Matinee Musicale in de Maaspoort in Venlo. Wir sind Spitze is ‘n Alpen-Spatzen-Buben-Rocker-Schlager-Freunde-& Krainer-Pop-Rebelle-Kapelle bestaonde oét 5 multi-instrumentaliste, die veur ‘n opperbeste stumming kinne zörge. Daonaove kin ‘t publiek geneete van de Toddezek oét Grubbevors. Dit trio det al twië kiër ‘t LVK haet gewonne, steit auk dit jaor weer in de finale. Auk kinne de gaste op ‘t Matinee Musicale geneete van Jocus eige Hofkepèl. Zenger Sander Driessen zal same mit de zangeresse Rian de Jong en Ingrid Reijnders weer tal van Venlose “evergreens” op Jocusbuun laote huure.

Naeve Wir sind Spitze, de Toddezek en de Hofkepèl haet ‘t Matinee Musicale nog vuul miër. Netuurlik zal ‘t nieje dreejspan van Venlo zich aan ‘t publiek prissentere. D’r zien optraejes van de Prinsekepèl, Sandra en Marco en d’r is ‘n slinger mit de winnende Jocusleedjes van de aafgelaupe elf jaor. Maar auk niej talent zal van zich doon spraeke. Zoë zulle de winaers van de Herfshanen, Lisa en Roos mit ‘t leedje “Vleege”, weer van de partiej zien en guf de winnaer van ‘t Jocus Jeugsvastelaoveskonkoer, de kinderen van de Zuidstroom, acte de presence. Netuurlik kint ‘t publiek auk geneete van de veer winnende Jocusleedjes en zulle de minse getrakteerd waere op dans en acrobatiek van de Rheinveilchen oét Kölle.

‘t Matinee Musicale, det daags nao ‘t Hofbal plaats vindt, is de aafgelaupe jaore oétgegreujd tot ‘n evenement vol dans, zang en meziek. ‘t Jocusevenement begint rond 14 oor, geliek nao de Prinseresepsie. De toegang is gratis. Al wuurt ‘t drage van de niejen Opstaeker, te kaup in de Maaspaort, door Jocus ziër gewaardeerd.