Jocus mak zich op veur nieje Vors Joeccius XI

Zaoterdaag 3 september en zondaag 4 september staon veur Venloosch Vastelaoves Gezelschap Jocus in ‘t teike van de Vorste Wissel.

Op zaoterdaagmiddaag 3 september zal tiédes ein biézôndere leejevergadering in de parterre van ‘t Stadhoés d’n hiër Harry Pouwels abdicere as Vors Joeccius XI van Jocus. Hae druuëg nao 15 jaor de scepter euver aan ziene opvolger. Aansloétend zal d’n hiër Roel Versleijen geïnstalleerd waere as de nieje Vors Joeccius XI. D’n hiër Versleijen woort 30 mei jongsleeje door de leeje van Jocus unaniem gekaoze als nieje Vors Joeccius XI/voorzitter.

Aansloétend vindt d’r zaoterdaag op de Mert veur ‘t Stadhoés ein feestelik en gratis toegankelijk meziékprogram plaats mit diverse Joekskeppele. ‘t Program start umstreeks 17.00 oor en wuurt meugelik gemak door Jocus en de horecaondernemers op de Mert.

Op zondagmiddaag 4 september vindt in Domani de feestelikke aafscheidsreceptie plaats van d’n hiër Harry Pouwels. Tiédes de receptie is ‘t vanzelfspraekend auk meugelik um de nieje Vors Joeccius XI te fillicitere. De receptie haet plaats in Domani, Dominicanenplein Venlo en deurt van 14.11 oor wiés 16.00 oor.