Jocus… Kuns… Jocuns

Beej gelaegeheid van ‘t 165-jäörig jubileum van Venloosch Vastelaoves Gezelschap Jocus is ‘n oproop gedaon aan alle kunstenaers mit ‘n vastelaoves-hert um ‘n kunswerk te make mit as thema 165 jaar vastelaovend in Venlo. Dit kunswerk moch ‘n gedich zien, ‘n schilderie, ‘n beeld of messchiens waal iets hiel anders. Nao aanleiding van dezen oproop haet ‘n groët aantal kunstenaers zich gemeld beej Jocus en zien zeej de kreatieve oétdaging aangegaon.  De inzendinge zien mit ingang van maondaag 7 jannewarie te bewondere in verschillende etalages van de Venlose binnestad. De winkelvereiniging van de Gashoésstraot en Van de Wouw in de Groëte Baekstraot zien bereid gevonde um as platform veur deze kuns-uutinge te deene. De kunswerke zien op die lokasies te bewondere wies aswoensdaag.
In dees periode zulle de kunswerke waere beoordeild door ‘n vakzjurie onder leiding van Hans Reinders, beeldend kunstenaer. ‘t Meis kreatieve, moëiste, origineelste kunstwer zal door Jocus waere beloënd mit ‘n geldpriés van € 500 dae ter beschikking is gesteld door Vors Joeccius XI.

De inzendinge variëre van kunswerke door gerenommeerde kunstenaers wies kunswerke van amateurs oét Venlo en umgaeving. D’r is zelfs ‘n kunswerk aangebaoje oét Amsterdam.

Biezonder is ‘n beejdrage van de Komac Molenbossen, wao ‘n aantal meiwerkers mit ‘n verstandelijke beperking zich gedurende de aafgelaupe waeke hebbe laote inspirere door ‘t vastelaoves-thema. Mit zelf geverfde stufkes hebbe zeej ’n moëi raamwerk gemaak wao-in de Jocushaan is geplaats. ‘t Kleurriéke gehiël hebbe zeej vlak veur de feesdaag aan Jocus euverhandig. Beej dae gelaegenheid hebbe zeej de wins oétgespraoke det ‘t waallich oëits wuurt opgenaome in de vaste vastelaoveskollektie van het Limburgs museum.