Jocus Jubelkedo veur Venlose horeca

Maondag 12 november haet Vors Joeccius XI ‘t iërste exemplaor van ‘n spesjaal Jocus Jubelkedo oétgereik aan OB de Woers.  ’t Kedo is ’n spesjaal gemakde CD mit dao-op de iërder verlaore gewaande vastelaovesleedjes “Pingalia” en “Heimwee nao Venlo”. Iërder verscheene beide leedjes auk al op de DVD/CD dae Jocus ter gelaegeheid van ‘t 15 x 11 jäörig jubileum haet oétgegaeve. “Aevel de waarschienlijkheid det dees leedjes in de kefees gespeuld waere is beperk, want welk kefee speul ’n leedje det op ‘n DVD steit?” vruuëg Roel Versleijen waordveurder van Jocus zich aaf. Vandao det de leedjes noow auk in beperkte oplaag zien verscheene op ‘n CD. In ‘n begeleidend schriéve wins Jocus de Venlose horeca ondernemers ‘n fantastische vastelaovend en sprik de wins oét det de horeca ondernemers ‘t kômmend vastelaovesseizoen naeve dees twië Venlose schlagers van waaliër, mit name alle euverige Venlose vastelaovesschlagers oét eur geluudsinstallaties luuët klinke.

Vurrig seizoen woort in de diverse media ‘n breije diskussie geveurd euver de kwaliteit van de vastelaovesmeziek in de horecagelaegehede, dae volges vuul Venlonaere vaer onder de maot waas. Vuul kefees dreije te hard, waodoor joekskepèlle, hermenieje en de fanfaar zelfs beej de groëten optoch euverschrieëwd waere door ‘t elektronische geweld oét de kefees. “Dao naevebeej zien d’r tal van Venlose kefees die “Anton aus Titol” en andere neet-vastelaoves-remmiedemmie preferere baove de prachtige Venlose vastelaovesmeziek. Venlo meug gruuëts zien op dae enorme schat aan geweldige leedjes dae de Venlose vastelaoveskultuur riék is. Stök veur stök parels wao meinig andere stad in Limburg jeloers op is. Dat môtte we koestere”, alzoë Versleijen.

‘t Initiatief sluut naodloos aan beej de oétspraok van börgervader Bruls det Pingalia dè hit van dit vastelaovesseizoen geit waere. De beschermhiër van de vereiniging deej dees oétspraok tiédes de verjäördaag van Jocus en de äöpening van de jubileumexpositie op 6 oktoëber in Domani. De börgervader zoel dao waal ens geliék in kinne kriege, want Jocus haet vreejwaal alle joekskepèlle en andere meziekgezelschappen de arrangemente van de alde vastelaovesleedjes die op initiatief van Wim Roeffen dit jaor zien veiliggesteld veur ‘t naogeslach, doon toekômme.

‘t Iërste exemplaor van ‘t Jocus Jubelkedo is maondaag 12 november aangebaoje aan de Stichting OB de Woers in Grandcafé Baer de Woers. “’n Fantastische groep minse mit ’n haup kreatieve ideeje. Zeej waardere de Venlose kultuur, haole alde tradities truuk nao deze tied en vooge d’r leuke nieje dinger aan toe”, zoë zaet Vors Joeccius XI.