Jocus Jeugd Vastelaovend Leedjes Konkoer (JVLK)

Tiedes ‘t kômmende vastelaovendsezoen zal veur de 13e kiër ‘t “Jeug Vastelaovend Leedjeskonkoer” waere gehalde. De aafgelaupe waeke hebbe alle kinder van de basisschoële in ‘t stadsdeil Venlo ‘n breef van Jocus gekrege wao-in ze waere oétgenuëdigd um deil te neme aan dees leedjeswedstried.

‘t JVLK is ‘n ideej van Jocusvors Harry Pouwels, toen stadsprins, dae vond det de Venlose kinder miër betrokke meuste waere beej de Venlose vastelaovend. De Joekskemissie van Jocus onder aanveuring van wijle Bart den Biesen zat dao de schouwers onder zoëdet d’r ‘n heus Venloos kinderleedjes konkoers ontstond.

‘t Is de bedoeling det de kinder van de Venlose basisschoële same mit eur meister of juf ‘n eige teks schriéve op ‘n gecomponeerde melodie. Daonao meuge ze eur kreasie op “Jocusbuun” oétveure. ‘n Vakzjurie bepaold wae oétintelik de winnaer wuurt en dus “d’n Bart” wint, ‘n trofee verneump nao Bart den Biesen. As klap op de veurpiel meuge de winnaers eur leedje inzinge in de studio van Jan Theelen in Munstergelaen en kriege ze ‘n plekske op de Jocus CD. ‘t Jeug Vastelaovend Leedjeskonkoer wuurt gehalde op 10 fibberwari 2012 in de Venlonazaal en begint um 13.30 oor.