Jocus is ‘in’; Prônkzitting oétverkôch

De Jocus Jubel Prônkzitting van woensdaag 14 november sluut naodloos aan op de jubileumexpositie. Veur ‘t programma is namelik gezôch in de riéke historie van prônkzittinge van de jubilerende vereiniging. Absolute hoëgtepunte oét ‘t verleden passere de revue. En de Prônkzitting is op veurhand volledig oétverkôch. De aafgelaupe waeke en maonde is ‘t gen inkele Venlonaer ontgaon: Jocus viert fees. In ‘t kader van ‘t 15×11-jäörig jubileum waere tal van nieje evenemente georganiseerd. Bestaonde evenemente waere euvergaote mit ‘n ‘jubileumsuiske’ en diverse andere intiatieve waere aangegaon: samewerking mit schoële in ‘t kader van kultuuronderwiés, ‘n DVD/CD-box en nieje merchandizing.

Det Jocus op dit moment ‘in’ is, meug blieke oét ‘t hoëge tempo waomei de kaarte veur de Leedjesaovend woorte verkôch, ‘t groëte aantal downloads van Jocus-meziék en reaksies op ‘t thoésblaad, de run op de DVD/CD-boxen (1000 exemplaore zien de aafgelaupe daag verkôch), veur zaoterdaag 17 november (Jocus Jubelnach) waas ‘n aopenbare verkaup neet ens meugelik. De kaarte ware op veurhand al verkôch aan leeje, donateurs en sponsore. Veur de Jubelnach op 16 november zien nog inkele kaarte beschikbaar. En de expositie; hônderde Venlonaere zien de aafgelaupe daag langs de riékgevölde vitrinekès getrokke en hebbe izch kinne vergape aan al ‘t moëis.

Zoë auk de Jocus Jubel Prônkzitting. De zitting bliek volledig oétverkôch, terwiel d’r nog gen aopenbare verkaup is gewaes. De aopenbare verkaup, dae aanvankelijk gepland staond veur 31 oktoëber geit dan auk neet door.

‘t Bliek det ‘t draagvlak veur de vereiniging groëter is dan oëits, bringk Jocus produkte wao vraog nao is, in ‘n vertrouwde kwaliteit. En dao meuge we in ‘n jubeljaor bes ‘n gruuëts op zien.