Jocus intensiveert samewerking mit Studio Theelen

Vanaaf ‘t seizoen 2015-2016 gaon Venloosch Vastelaoves Gezelschap Jocus en Studio Theelen stapsgewiés ‘t groëte Jocus rippertoire digitaal ôntsloéte. Deze zomer zal beej wieze van proof de iërste LP, Vastelaovend Same! dae door Jocus in samewerking mit Studio Theelen in 1976 is oétgegaeve, waere gedigitaliseerd door Studio Theelen um vervolges online te waere gezatte.

Venlose Vastelaoves-evergreens as “Minsekinder”, “Wao gaon we haer” en  “Hadse mich geflaote”,  zien dan te downloade beej iTunes en streaming deenste wie Spotify. Beej voldoende interesse wuurt alle Jocusmeziék geleidelik digitaal gedistribueerd. Sinds 1962 guf Jocus idder jaor eine geluudsdraager oét mit de winnende Vastelaovesleedjes.

Seizoen 2015-2016: CD èn exclusieve LP

Jocus geit ‘t kômmende seizoen de samewerking mit Studio Theelen in Munster Geleen vaerder oétbouwe. Jan Theelen verzörg ouk dit jaor weer de arrangemente van de nieje Jocus schlagers en de winnende leedjes van de Herfshane en ‘t Jeug Vastelaoves Leedjes Konkoer. Ziene zoon Emmanuel teikent veur de opnametechniek. De CD wuurt dit jaor oétgebreid mit inkele nog noeit op CD oétgegaeve nummers. Veur de echte leefhebber wuurt d’r daobaove van dees productie ein LP  in gelimiteerde oplage oétgebrach. Ouk de nieje CD 2015-2016 kin waere gedownload via iTunes en Spotify.

Mit dees veurgenaome stappe wilt Jocus ‘t Venloos vastelaovesleed nog harder laote klinke, ouk via de meugelikhede van de huidige tiéd.

Deilname aan Opus Jocus Leedjesaovend 2015

Inschriéving veur deilname aan de Opus Jocus Leedjesaovend 2015 is nog meugelik wies zaoterdaag 1 augustus 2015. De veurseleksie vindt plaats op zaoterdaag 29 augustus aanstaonde. Laes dao euver miër op deze pagina.