Jocus Hofbal oétverkoch

‘t Jocus Hofbal, det op zaoterdaag 15 fibberwari aanstaonde in Theater de Maaspoort plaats vindt, is oétverkoch. Tiédes deze stielvolle Gala Aovend zal Vors Joeccius XI de nieje Stadsprins en zien Adjudante bekindmake.

“Weej zien vergöld mit ‘t niejs det alle kaarte al zoë vlot zien verkoch. ‘t Hofbal is haos ein traditie op zich. Uniek in Venlo. Ouk dit jaor belaof ‘t veur ôs gaste weer ein prach editie te waere.” alzoë Vors Joeccius XI d’n hiër Harry Pouwels.

Tiédes d’n aovend traejt ein keur aan artieste op. ônder andere Pearl Jozefzoon, PPM Band en Frans Pollux betraeje Jocus buun. Jocus Hofkepèl zal in samewerking mit ein keur aan zengers en zangeresse inkele speciale optraejes gaeve.

Naeve ‘t muzikale program steit de Hofbalgaste nog ein aantal verrassinge te wachte.

Rônd 21.11 oor zal Venlo weite wae ôs de kômmende Vastelaovend veurgeit. Wies det moment blief ‘t antwaord op die vraog nog ‘t groëtste geheim van Venlo…

Veur de thoésbliévers bringk Omroep Venlo via de radio ein live verslaag vanoét Jocus Hoonderstal. ‘s Aoves vanaaf 24.00 oor is op Omroep Venlo tillevisie ein impressie te zeen.

Miér informatie euver Jocus Hofbal is te vinde via: http://www.jocus.nl/hofbal/