Jocus geit cradle to cradle

Vriedag 17 july 2009

Jocus haet ein primeur mit de oétveuring van de Vleeger volges ’t cradle to cradle principe. Venloosch Vastelaovesgezelschap Jocus bringk al ’n groët aantal jaore ‘nne vleeger oét wao-in weej vastelaovesminnend Venlo informere euver al ôs evenemente en aktiviteite in ’t aanstaonde seizoen. De vleeger wuurt vlak veur de zomervekansie verstuerd nao alle Jocusleeje en wuurt in de waek van de cultuurzondaag in september verspreid nao alle posadresse in ’t stadsdeil Venlo (20.000 exemplare). Op die meneer hoof neemus auk maar iets te misse van dit gruutse volksfees. Beej de meiste Venlose hoéshaldes is deze vastelaoveskalender dan auk neet miër weg te dinke van ’t prikbord of ’n hendig magneetbord in de keuke.

Dit jaor verspreidt Jocus ‘nne vleeger dae gehiël volges ’t cradle to cradle principe is gemak. ’t Pepeer, de drökink en alles waat d’r vaerder beej kump kiéke is duurzaam. De vleeger is zelfs veurzeen van ’t originele cradle to cradle keurmerk.

Jocus geit heejmei veurop in de ambitie van Venlo. Mit cradle to cradle tummert Venlo aan de waeg. Jocus tummert mei… Al miër as 165 jaor!