Jocus en Junior Kamer Venlo prissentere: ‘t Séparé
Niej vastelaovesevenement op zondaag 11 jannewari 2015 in Theater de Maaspoort
Same maar toch apart…Dames en hiëre in eine stiélvol ingerichde zaal geneetend van ein fantastisch programma maar…zônder det ze ein zeen. Det is d’n opzet van ein uniek nieje Vastelaoveszitting.
Ein uniek evenement
Séparé is miër as ‘n Vastelaoveszitting. In eine stielvol aangekleide Frans Boermanszaal zulle zoëwaal dames as hiëre te gas zien, maar.. waal gescheie vanein. ‘t Programma zal verrassend zien en tot op d’n daag van de zitting geheim bliéve. De hiëre waere verwach in smoking, de dames in “’t op ein-nao moëiste kledje”. De zitting begint um 11.11 oor en deurt wies 14.30 oor. De opbrings van de middaag geit nao ‘t gooje doel: de Roëje Kruutszitting.
Ein moeie aanvölling op de Vastelaoves agenda van Venlo
Vors Joeccius XI, Harry Pouwels, guf aan ziër in zien nopjes te zien mit dit evenement. “Junior Kamer Venlo (JCI Venlo) mak deil oét van ein waereldumvattende organisatie mit ein ziër krachtige Venlose aafdeiling. Leeje van de Junior Kamer Venlo hebbe mit tal van aanspraekende evenemente beweze ziër good in staot te zien fantastische evenemente te kinne organisere, net as Jocus. De samewerking tösse dees twië vereiniginge haet geleid tot ein uniek en verrassend vastelaovesevenement wao-aan ein ziër good doel is gekoppeld. Waat mich betref is dit op veurhand al ein succesformule.”
Junior Kamer Venlo veurzitter Stefan Bouwman: “Door ôs krachte te bundele hebbe we ein moëi niej evenement kinne toevooge aan d’n agenda van Venlo. ‘t Kônsep van ‘n Vastelaoveszitting is neet niej, maar waal det zoëwaal dames as hiëre tegeliék ôntvange waere, zônder det ze ein zeen.”
Kaarte zien vanaaf noow te koup via info@jocus.nl en info@JCI-venlo.nl o.v.v. aantal dames of hiëre. D’n entree kos € 99 (excl.BTW) per persoën, inclusief drank en hepkes.
Miër informasie: www.jocus.nl/ en http://www.jci-venlo.nl/.
Euver Junior Kamer Venlo
De Junior Kamer is ônderdeil van ein waereldwieje netwerkorganisatie JCI (Junior Chamber International) veur ôndernemende minse wies 40 jaor die zich persoënlik wille ôntwikkele. De Junior Kamer Venlo is de organisator van miërdere evenemente in Venlo en umstreke, zoëas ‘t jäörliks truukkiërend culinair evenement “Lekker Venlo”.
Euver Venloos Vastelaoves Gezelschap Jocus
Venloosch Vastelaoves Gezelschap Jocus haet as doel um de vastelaovestraditie in Venlo in stand te halde en te bevordere door ‘t organisere van bals, zittinge, optochte en andere uutinge die eur doel ôndersteunt. De activiteite richte zich op riék en erm, jôngk en ald. Idder jaor bringk Jocus de Venlose vastelaovesleedjes oét op cd en publiceert zeej eur eige Staatsorgaan De Träöt.
www.jocus.nl
De Roëje Kruutszitting
De Roëje Kruutszitting is ein Vastelaovesevenement veur minse mit ein beperking. De organisatie is in hand van de Venlose aafdeiling van ‘t Roëje Kruuts en V.V.G.Jocus. Diverse artieste en vereiniginge gaeve eur meiwerking aan deze ônvergaetelikke middaag in Theater de Maaspoort. De Roëje Kruutszitting 2015 vind plaats op zaoterdaag 7 fibberwari 2015.