Jeug Vastelaoves Leedjeskônkoer viert elfde verjäördaag!

Vanmiddaag wuurt veur de elfde kiër door Jocus ‘t Jeug Vastelaoves Leedjeskônkoer georganiseerd in de Venlonazaal. Maar leefs 8 schoële oét ‘t stadsdeil Venlo neme deil mit idder circa 30 kinder.  Jocus startte elf jaor geleeje mit dit kleurrieke evenement mit de muzikale mitwerking van wijlen Bart den Biesen. De haufpries druuëg de naam van deze vastelaovesgigant: D’n Bart. De winnaer krieg naeve ‘n prachtig beeld auk ‘n daag oét nao Studio Theelen wao eur nummer wuurt vasgelag veur de Jocus CD. Taeves waere de winnaers getrakteerd op de meugelijkheid um op alle groëte en kleine Jocusbuuns op te traeje. Dit jaor is d’r ‘n extra pries: ‘De veer van Geer’. Deze pries wuurt oétgereik aan de sportiefste en bes verkleide kindergroep. De kinder ontvange ‘n luxe versierpakket um de kômmende daag eur klaslokaal mei te versiere.

Al in ‘n vruug stadium ontvange alle schoële ‘n meziekband mit dao-op 3 melodieje die spesjaal veur deze gelaegenheid al elf jaor op riej zijn gekomponeerd door Wim Roeffen. ‘t Is de bedoeling det de kinder zelf tekste bedinke mit ‘n beejpassende act wao ze oétintelijk tiedens ‘t kônkoer de wedstrijd mei aangaon.

‘De zjurie van vanmiddaag haet ‘t hiel moeilijk. De inzendinge zien van enorm hoëg niveau’, alzoë ‘n gruuëtste Prins Marcel van Jocus, dae zelf deil oétmak van de zjurie. ‘Door de schoële op dees menier al elf jaor op riej naodrökkelik mit vastelaovend te verbinde, weite we zeker det dit prachtige fees auk veur de toekoms is geborg’.