In Memoriam Jan Pollux

Mit dreuvenis vernaome weej ‘t haergaon van

d’n hiër Jan Pollux

50 jaor Jocus lid
Kômmandeur in de Orde van de Zwalm

Jan waas eine echte Professor in de Humor, stond mier as 55 jaor in de buut en wis de Vastelaoves-joeks as gènne andere te verkondige. Zien tekste ware noeits kwetsend, maar hele idderein de spegel veur van ‘t alledaagse laeve, gelardeerd mit ‘vastelaoveskwats’. Van ‘Sangria wies Majenais’, Jan relativeerde alles en wis in de buut idderein mit beide veut op aerd te kriege. Zien vermeuge um kinnis en ervaring te deile mit nieje talente waas groët en beteikenisvol veur de toekôms van Jocus.

Mit ‘t haergaon van Jan verluus Jocus ein lid mit ziër groëte verdeenste en drager van de Golde Narrekap. Ontelbaar vuuël Jocus evenemente haet Jan mit zien optraejes glans gegaeve en veurzeen van ein oer Venloosch Vastelaoves-etiket. In aeve zoë vuule kreasies kreeg Jan de lachers op zien hand, wao beej ‘Sintermertes Veugelke’ in idders geheuge wies in lingte van daag steit gegraveerd.

Venloosch Vastelaoves Gezelschap Jocus wins Mieke, Frans, Maud, Puk en Jan van herte alle sterkte toe dit groëte verleer te verwerke. Weej zien d’r van euvertuug det de schoën herinnering aan Jan eur zulle beejstaon dit gemis ein plaats te gaeve. Jan ziene naam zal mit haufletters in de anale van Jocus waere beej geschreve.

Venlo, 11 september 2011
Names alle leeje van Venloosch Vastelaoves Gezelschap Jocus
Drs. Harry Pouwels, veurzitter / Vors