In memoriam: d’n hiër Wiel Vestjens

Vandaag kreege weej ’t dreuve niejs te huure van ’t haergaon van ôs ziër gewaardeerde lid,

Commandeur in de Orde van de Zwalm

In Wiel verluus Venlo en de Vastelaovend ein monument. Ein gôlde stum die veur generaasies Venlonaere ’t Venlose vastelaovesleed tot laeve brach.

In zien jônge jaore waas Wiel al aktief binne Jocus Toekôms. Heej woort ’t fundament gelag veur zien leefde veur de buun. Neet allein as zenger, maar auk as buutereedner. Smeis allein, maar döks is hae auk mit o.a. De Kammeräödjes of zien vrinde van Vaat Elf veur ’t vootleech getraoje binne en boéte de grenze van ’t Stedje van Lol en Plezeer en haet zoë ein ôngekinde beejdraage geleverd aan de groëte naam dae Venlo op vastelaovesgebied kreeg.

Auk zien haufrolle in de Venlose Revue zien beej ’t groëte publiek euverbekind.

In de 55 jaor det Jocus ‘t veurrech had um Wiel, as lid van de Joekskemissie, in zien midde te hebbe, haet hae ein ônmisbare beejdrage geleverd veur de Venlose vastelaovend en Jocus. Veur al dees verdeenste is hae miër as terech beneump tot Commandeur in de Orde van de Zwalm.

De letste groëte Limburgse iër die hae toegekind môch kriége waas de Gouden Narrenkap aafgelaupe november.

Weej winse de femilie vuuël sterkte beej ’t draage van dit groëte verleer.

Jocus zal Wiel mit groët respek gedinke.

Names Venloosch Vastelaoves Gezelschap Jocus