In memoriam d’n hiër Sjaak Linders

Lid van Jocus sinds 1971. Lid van de P+P kemissie. Cômmandeur in de Orde van de Zwalm. Sjaak zien groëte betrokkeheid beej Jocus waas enorm.
As hoffotograaf haet hae aan de basis gestaon van Jocus umvangrieke foto-archief. As eminence grise waas Sjaak eine persoën wao altied ein beroop op kos waere gedaon. Aan zien actieve lidmaatschap haet Sjaak wies ’t lets invölling gegaeve op ein wies dae waardering en bewondering haet.

Venloosch Vastelaoves Gezelschap Jocus verluus in Sjaak ‘n groëte krach. Weej zien bedreuf umdet Sjaak neet meer beej ôs is, maar dinke mit vuul respek truuk aan zien verdeenste veur ôs vereiniging. Weej danke Sjaak veur alle jaore det hae mit zien bedrief Foto Kino Linders Jocus tot groëte steun is gewaes en weej tot in lingte van jaore gebroek kinne make van de verdeenste die hae veur Jocus haet gehad.

Ôs gedachte gaon oét nao zien vrouw Ton, zien kinder, schoënfemilie en kleinkinder. Weej winse eur vuul sterkte dit verleer te kinne verwerke, maar zien tegeliekertied euvertuug det de herinnering aan Sjaak ‘n groëte steun veur eur zal zien um dit op te bringe.