In 2016 eine nieje Vors Joeccius XI

Tiédes de Algemeine Leeje Vergadering van maondaag 14 september 2015, haet ôzze Veurzitter en Vors Joeccius XI, d’n hiër Harry Pouwels, aangegaeve det hae zich nao ‘t aankômmende vastelaovesseizoen 2015-2016 neet miër herkeesbaar zal stelle en alzoë de Veurzittershamer en Vorstescepter ‘t volgend jaor euver geit drage.

Harry Pouwels is sinds 25 augustus 2001 Vors Joeccius XI. Heejaan veuraafgaond waas hae as 2e Sikkertaris, oftewaal Marquis Stempelnowski, lid van de Raod van Elf. In 2000 regeerde hae as Prins Harry I euver ‘t Stedje van Lol en Plezeer.

“’t Wuurt langkzaamaan tiéd um oét te gaon kiéke nao eine opvolger. Dao neemp ‘t bestuur röstig d’n tiéd veur. Det is ouk nuuëdig gezeen de verniejing en verjônging die op dit moment gaonde is binne ôzze Raod van Elf. De letste jaore haet Jocus zich op vuuël frônte wiejer ontwikkeld. We zien d’r gruuëts op wie de vereiniging d’r op dit moment veursteit en welke planne det d’r veur de toekôms ligge.

Ik vind ‘t belangriék det al ôs aandach tot en met de Vastelaovend van 2016 ten volle gerich is op ‘t dan niej regerende Jocus Dreejspan 2016 en ‘t korte Vastelaovessezoen det zoë aanstônds veur de deur steit. Pas daonao geit ôs aandach oét nao ‘t zeuke van miene opvolger.” aldus Harry Pouwels.